Монгол дахь БНСУ-ын Элчин сайдын яамнаас арванхоёрдугаар сарын 1-нийг хүртэл монголчуудад жуулчны виз олгохгүй гэдгээ мэдэгдсэн гэсэн мэдээлэл өнөөдөр нэлээд хэдэн сайтаар мэдээлсэн.
БНСУ-ын Инчон хотноо Азийн спортын XVII их наадам болж байгаатай холбоотой бөгөөд тус улсын Элчин сайдын яамнаас манай улсад оршин суух иргэддээ хандан сэрэмжлүүлэг гаргасан.
Үүндээ “Монгол Улсын төрийн далбааг буруу харуулж мандуулсан, Монголын эмэгтэй тамирчдын хоолонд бохир зүйл хийсэн, буруу шүүлт явуулсан зэрэгт монголчууд бухимдалтай байгаа тул Монгол Улсад байгаа Солонгос иргэдийг уг тэмцээний талаар өөрийн үзэл бодлыг хамаагүй илэрхийлэхгүй байх, орой үдэш явахдаа болгоомжтой байгаарай” гэсэн байсан юм.
Дээрх мэдээллийн талаар БНСУ-аас Монгол Улсад суугаа Элчин Сайдын яамны Визийн асуудал хариуцсан хэлтсийн ажилтнаас тодруулахад “Виз мэдүүлэх дүрэм, журамд ямар ч өөрчлөлт ороогүй. Гадуур цацагдсан мэдээлэл худлаа. Виз хэвийн олгогдож байна” гэж хариуллаа.
