Гавьяат жүжигчин, дуучин Т.Ариунаагийн нөхөр Г.Буяндорж улсын төсөвт их хэмжээний хохирол учруулсан хэрэгт холбогдоод нэлээдгүй хугацаа өнгөрч байгаа. Энэ бүхэнд хамгийн их харуусч шаналсан хүн бол мэдээж түүний гэргий Т.Ариунаа болон хоёр хүү нь. Хэвлэл мэдээллийн хэрэгслээр дуучин Т.Ариунаагийн нөхөр Г.Буяндоржид холбогдох хэргийн дагуу гэр орныг нь битүүмжлэн эд зүйлийг хураасан, мөн дуучин бүсгүйг хүүхдүүдийн хамт хил давахыг хориглосон, сэтгэл санаагаар унаад архичин болсон гэх зэрэг элдэв зүйл цацагдаж байсан нь үнэн.
Харин энэ бүхэнд тайлбар хийж, нэгэн ярилцлагадаа дуучин Т.Ариунаа нулимс дуслуулан “Гэрийг минь битүүмжлээгүй, харин миний машиныг хурааж авч байсан. Авах зүйл байгаа бол аваг. Надад гэр бүлийн минь элэг бүтэн амьдралаас өөр юу ч хэрэггүй. Голоо гогодон байж эцсийн мөч хүртлээ би ханиа хамгаална. Намайг од байлгахын тулд найдвартай түшиж тулгуур нь болно гэсэн амлалтынхаа ард миний хань 17 жил цэх зогссон.
Харин өнөөдөр надтай ханилсныхаа төлөө ийм зовлонд унаж, амьдын хагацал үзнэ чинээ санаагүй биз. Хэн нэгний захиалгат гүтгэлэг, явуургүй аргаас болж би өчнөөн муу нэр зүүж, ханиа ийм байдалд оруулахад хүргэсэн байна. Миний хүчинд өдий зэрэгтэй болсон, сайн сайхан амьдралд хүрсэн өч төчнөөн хүмүүс над руу нэг ч утасдаагүй” хэмээн ярьсан билээ. Мөн тэрбээр ийм хүнд цохилтонд орчихоод байгаа үед зовлонгоор нь тохуурхаж, элдвээр ярьж бичихгүй байхыг хэн бүхнээс хүсчээ. “Миний нэр алдар хий хоосон зүйл байж” гэсэн гавьяат жүжигчин, дуучин Т.Ариунаагийн сэтгэлийн шаналанг уншигчид маань ч өөр өөрсдийнхөөрөө ойлгож тунгаана биз ээ.
Б.Содон
