1920-иод оны Монголыг гадныхан яр тэмбүүндээ баригдсан улс хэмээн адалж байлаа. Энэ яриа 1960-аад онд ч гарч л байсан. Тухайн он жилүүдэд манай эдийн засаг нийгмийн хөгжил , хүн амын эрүүл мэндийн соёл боловсрол аль аль нь сул дорой байлаа. Тиймээс тэмбүү өвчнөөр өвчлөгчдийн тоо өндөр түвшинд хүрч байсан гэдэг. Зарим нь хошигноод “Улаан тарианы монголчууд” гэх нь элбэг тохиолдож байв. Улаан тариа гэдэг нь уг өвчнийг нам дардаг сайн эм тарианы төрөл гэх үү дээ.
Тэгвэл өнөөдөр манайд тэмбүү нь сэтгэл зовоосон өвчний нэг хэвээрээ байгаа ажээ. Судалгаагаар энэ өвчин өнгөрсөн онд 10 хувиар өссөн дүнтэй байна. Тэмбүү нь бэлгийн замын халдвар өвчин бөгөөд ер нь энэ төрлийн өвчлөлт нийслэлийн хэмжээнд нийт өвчиллийн 43 хувийг эзэлж буй аж. Тэдгээрийн дотор тэмбүү 51 хувьтай байна. Заг хүйтэн 22 хувьтай. Ингээд бодохоор тэмбүү яах аргагүй анхаарал татсан өвчний нэг болжээ. Сүүлийн үед жирэмсэн эхчүүдээс ч тэмбүүгийн шинж тэмдэг илэрч урагт нөлөөлөх хандлага нэмэгдэж байгаа юм байна. Манай гурван сая дахь иргэн удахгүй мэндэлнэ. Тэдний хэд нь тэмбүүтэй байх бол. Төрөлхийн тэмбүүтэй хүүхэд төрөх магадлал өндөр байдаг тухай мэргэжилтнүүд хэлж байна. Ичмээр, бас аймаар ч юм шиг.
Б.Отгонбаяр
Эх сурвалж: Tumen.mn
