УИХ-ын гишүүн Ж.Батзандан, Д.Батцогт, С.Ганбаатар нар хэвлэлийн хурал зарлалаа. Тэд “Цалин тэтгэврийг нэмэгдүүлэх шаардлага”-ыг Засгийн газарт хаяглан хүргэхээр болсноо мэдэгдэв. Тэдний энэхүү санаачлагыг УИХ-ын гишүүн Х.Болорчулуун, Ц.Даваасүрэн нар дэмжлээ. Мөн УИХ-ын гишүүн О.Баасанхүү, З.Баянсэлэнгэ нар хэвлэлийн хурлын танхимд биечлэн ирж албан ёсоор дэмжиж байгаагаа илэрхийлсэн юм.
Нэр бүхий эдгээр гишүүдийн зүгээс ирэх 2015 оны төсөвт цалинг 30 хувиар нэмэгдүүлэх, тэтгэврийн доод хэмжээг 300 мянган төгрөгт хүргэх шаардлагатай байгааг тодотгосон юм. Хэдийгээр улсын төсвийн сан хөмрөг дундуурхан байгаа ч сайд, дарга нар гадаад томилолтоо багасгаж тэтгэвэр нэмэх боломж бий гэдгийг онцоллоо.
Түүнчлэн өнөөдөр инфляци 13,7 хувьтай, өргөн хэрэглээний бараа бүтээгдэхүүний үнэ ханш өмнөх жилээс 40 хувиар өсчихөөд байгаа нь Засгийн газар, Монголбанкны үйл ажиллагаатай холбоотой гэдгийг ч хэллээ.
УИХ-ын гишүүн С.Ганбаатар “Урьд өмнө нь цалин, тэтгэвэр нэмснээс болж инфляци өслөө гэж гүйцэтгэх засаглалынхан тайлбарладаг байсан. Гэтэл сүүлийн хоёр жилд цалин, тэтгэвэр нэмээгүй байтал инфляци өссөөр байгаа нь “өөр шалтгаан” байгааг харуулж байна. Тиймээс бид Засгийн газар, Монголбанкыг ажлаа хийхийг шаардахаас аргагүй” гэв.
Мөн УИХ-ын гишүүн Ж.Батзандан “Ирэх оны төсөвт цалин тэтгэврийн нэмэгдэлд зориулж 500 тэрбум төгрөг тусгаж байгаа нь хангалтгүй. Дөнгөж л инфляцийн нөхсөн хэмжээний энэ нэмэгдлийг өсгөж, цалинг 30 хувь, тэтгэврийн доод хэмжээг 300 мянган төгрөгт хүргэх ёстой. Ингэж тооцвол доор хаяж 800 тэрбум төгрөг тусгах хэрэгтэй байна” хэмээсэн юм.
Х.Даваа
Эх сурвалж: www.dorgio.mn
