Монгол Улсын Ерөнхийлөгч У.Хүрэлсүх Ерөнхий сайд Л.Оюун-Эрдэнэ тэргүүтэй танхимынх нь сайд нартай өчигдөр уулзаж, “зорилтод бүлгийн болоод ахмадуудын тэтгэвэр, тэтгэмжийг нэмэгдүүлэхэд чиглэсэн тодорхой шийдлийг яаралтай боловсруулж, хэрэгжүүлэн ажиллахыг Засгийн газарт чиглэл болгосон. Энэ нь түүний Төрийн тэргүүний хувьд нийгэм рүүгээ хандсан анхны гэж хэлж болохоор том ажил, санаачилга байлаа. Харин Монгол Улсын Ерөнхий сайд Л.Оюун-Эрдэнэ уулзалтаас гарч ирээд, Засгийн газрын гишүүдэд тэр дундаа Сангийн сайд Б.Жавхлан, Хөдөлмөр, нийгмийн хамгааллын сайд А.Ариунзаяа нарт тэтгэвэр, тэтгэмжийг нэмэх боломжтой талаарх судалгааг яаралтай хийж ир. Энэ тухай надад яаралтай танилцуулаарай. Бүхий л боломж, бололцоо, шийдлийг судал хэмээн үүрэгдсэн байна.
Энэ дагуу Засгийн газрын ээлжит бус хуралдааныг ойрын хугацаанд зарлаж, тэтгэвэр, тэтгэмж нэмэх асуудлаарх мэдээллийг сонсохоор болж, дорвитой шийдвэр гаргахаар болсон тухай таатай мэдээ байна.
