Цахим орчин дахь гадуурхал, дээрэлхэлтийг эсэргүүцсэн хятад бүсгүйчүүд өвөрмөц аргаар тэмцэж эхэлжээ. Тэд үсээ ягаан өнгөөр будаж, тэмцэлд нэгдэж байгаагаа илэрхийлэх болсон гэж SCMP сонин мэдээлсэн байна. Ийнхүү үсээ ягаан өнгөөр будах болсон нь 23 настай Жэн Линхуагийн амиа хорлолттой холбоотой аж.
Жэн бүсгүй үсээ ягаан өнгөөр будсаныхаа төлөө 2022 оны долдугаар сараас эхлэн цахим ертөнцөд ихээхэн халдлагад өртөж, доромжлуулсан аж. Тэрбээр магистратурд элссэнийхээ дараа цахим хуудсандаа үснийхээ өнгийг өөрчилсөн талаар бичиж, зургаа оруулсан байна. Гэтэл хүмүүс түүнийг секс ажилтантай адилхан байна хэмээн бичжээ. Хагас жилийн дараа Жэн өөрийг нь доромжилсон хүмүүсийг шүүхэд өгсөн ч ямар ч үр дүнд хүрээгүй аж. Ингээд цахим ертөнцөд доромжлуулсан бүсгүй сэтгэл гутралд орж, улмаар нэгдүгээр сард амиа хорложээ.
Энэ үйл явдал олон нийтийн дунд ихээхэн шуугиан тарьж, өдгөө сая сая бүсгүй Жэний дурсгалыг хүндэтгэж, цахим орчин дахь дээрэлхэлтийг эсэргүүцэхийн тулд үсээ ягаанаар будаж эхэлсэн байна. Энэ хөдөлгөөнийг Жейн Жэн эхлүүлсэн бөгөөд тэрбээр найзууд болон их сургуульд хамт сурдаг бүсгүйчүүдээ үсээ ягаанаар будуулахыг уриалжээ. Жейн түүнчлэн Жэн Жиньчу жүжигчний анхаарлыг ч татаж чадсан гэнэ. Улмаар жүжигчин бүсгүй цахим дээрэлхэлтийн хохирогч болсон хүмүүсийг дэмжин, ягаан өнгийн хиймэл үс зүүсэн гэрэл зургаа олон нийтийн сүлжээнд байршуулжээ.
