Монгол Улсын Ерөнхийлөгч Ц.Элбэгдорж өнөөдөр өөрийн санаачлан боловсруулсан Улстөрийн намын тухай хууль, Төрийн албаны тухай хуулийн төслүүдийн гол үзэл баримтлалаараа сэтгүүлчдэд мэдээлэл хийсэн. Энэхүү мэдээллийн цагт МАН-ын дарга М.Энхболд нар оролцсон бөгөөд “Эдгээр хуулийн өөрчлөлтөд намууд бэлэн үү” гэсэн асуултад ийн хариулав.

МАН-ын дарга М.Энхболд, “Ерөнхийлөгч хууль санаачлах эрхийнхээ дагуу 2 хууль санаачилж УИХ-д өргөн барих гэж байгаа юм байна. Энэ хоёр хуулийн хувьд хоорондоо их уялдаатай, монгол төрийн нүүр царай, монгол төрийн өнгө чадамж ямар байх вэ гэдэг нь энэ хуулиас шалтгаална. Бид хүссэн хүсээгүй ардчилсан зарчмаар сонгууль явуулж, төрийнхөө тогтолцоог бий болгож, ард түмэн өөрийнхөө төлөөллийг бий болгож, түүгээр улс орныг удирдаж, төр яаж хэрхэн үйл ажиллагаа явуулах вэ гэдэг нь төрийн албан хаагчаас шалтгаалж байна.

Энэ утгаараа төрийн албан хаагчийг тогтвортой ажиллуулах, чадавхжуулах, мэргэжшүүлэх тал дээр Ерөнхийлөгчийн санаачилсан хууль, мөн УИХ-ын гишүүдийн санаачлаад өргөн барьсан хуулиудыг нэгтгэж, одоогийн мөрдөгдөж буй хуулийг чанаржуулахад анхаарах ёстой. Төрийн албаны нэг нүүр царай бол төрийн улс төрийн албан тушаалтантай салшгүй холбоотой. Улс төрийн албан тушаал гэдэг бол улстөрийн намууд аль нэг албан тушаалтнаа тавьж, өөрийн намын бодлогыг хэрэгжүүлж, улс орныг авч явж байдаг. Тийм учраас улс төрийн албан тушаалтны чадал чансаа, мэдлэг боловсрол, олон нийтэд хүлээн зөвшөөрөгдөх байдал, тодорхой салбараар мэргэшсэн байдал гээд олон зүйлүүд байгаа. Тиймээс улс төрийн албан тушаалтныг бэлтгэх, улс төрд өрсөлдүүлэх нөөц бүрэлдэхүүнийг бий болгох асуудал бол намд ногдож байгаа үүрэг юм.

Төрийн алба түвшин байх, улс төрийн алба чадварлаг байх нь гарцаагүй намын боловсон хүчинтэй холбоотой. Монголын улс төрийн намууд сонгуульд оролцож, бүгдээрээ төрийн албыг гүйцэтгэе, төрийн албыг үргэлжлүүлье, улс орныг авч явья гэсэн эрмэлзэлтэйгээр намууд сонгуульд оролцож байгаа. Тиймээс өөрийнхөө улс төрчдийг, боловсон хүчнийг бэлтгэхэд анхаарах ёстой юм. Үүний тулд нам өөрөө чадалтай байх, боловсон хүчнээ бэлтгэдэг байх гэх эдгээр хүчин зүйлүүд их чухал. Улс төрийн намын тухай хуулийн зарим зүйл заалттай санал нийлж байна. УИХ хэлэлцэж байж батална. Ерөнхийлөгч санаачилсан хуулиа сайтдаа тавина гэж байна. Олон нийт хуультай холбоотой санал бодлоо хэлэх байх. Олон түмний саналыг харгалзаж байж Ерөнхийлөгч хуулиа өргөн барих байх гэж бодож байна" гэлээ.

Б.Туул

Эх сурвалж: "Монцамэ" агентлаг