1985 онд дэлгэцнээ гарч тухайн үеийн охид залуусыг байлдан дагуулж байсан “Би чамд хайртай” кино өнөөг хэр нь үзэгчдийн сэтгэлд хоногшсон хэвээрээ. Соц нийгмийн үзэл суртал, боловсролын хэмжүүр, иргэдийн ахуй амьдрал хийгээд охид залуусын хайр дурлалын талаар тун ч сонирхолтойгоор өгүүлсэн тус киноны гол дүрд Л.Эрдэнэбаяр, Н.Бадрал, С.Пүрэвмаа нар тоглосон билээ. Дэлгэрийн дүрийг бүтээсэн Л.Эрдэнэбаяр олон жилийн өмнө золгүй ослын улмаас бурханы оронд одсон ч түүний талаар дурсан ярих хүмүүс олон бий. “Би чамд хайртай” киноны Үрлээгийн дүрийг бүтээсэн загвар зохион бүтээгч С.Пүрэвмаа нэгэн хэвлэлд өгсөн ярилцлагадаа томоохон нууцыг задалсан аж.
“Хэдийнэ 20 насны босго давсан миний хувьд, дунд сургуулийн төгсөх ангийн сурагч охины дүрд тохирно гэдэгтээ нэг л итгэл муутай байлаа. Гэхдээ мундаг жүжигчид болон хоёр авьяаслаг залуугийнхаа ачаар тоглож чадсан гэж боддог. Үнэндээ тэр үед Дэлгэр, Баяраа хоёр маань надад үнэхээр сэтгэлтэй байсан юм шүү. Ялангуяа Дэлгэр маань Москвагийн консерватурын тоглолтод явж ирэхдээ надад хүзүүний ороолт авчирч өгсөн нь санаанаас огт гардаггүй юм. Харамсалтай нь, 1980-аад оны сүүлээр нас барчихсан. Биеийг нь муу байхад найруулагчтайгаа хамт очсон чинь надад битүүхэн үг шивнэсэн. Энэ нь надад маш хүнд цохилт болсон. Тэр үед би уйлаад хэсэгтээ л шоконд орсон шүү” хэмээн ярьжээ.
Харин тухайн үед яг л кинон дээрхи шиг үйл явдал өрнөсөн бөгөөд Баярааг сонгосон Үрлээгийн адилаар тэр ч мөн ганцаараа хоцорсон гэдэг. Хэсэг хугацаанд үерхэж дотноссон Н.Бадрал нь ОХУ руу явснаар сураг тасарч, хүлээж цөхөрсөн С.Пүрэвмаа нь өөр хүнтэй ханилсан түүхтэй. Өдгөө тэрбээр таван хүүхдийн эх бөгөөд иог бясалгалаар хичээллэдэг юм билээ.
Б.Содон
