Монгол Улсын Ерөнхийлөгч Ц.Элбэгдорж шинэ сайд нар томилох болон УИХ-ын намрын чуулганы үеэр голлон анхаарах зарим асуудлаар УИХ дахь нам, эвслийн бүлгийн дарга нартай өнөөдөр уулзаж чиглэл өгөв.Уулзалтад УИХ дахь Ардчилсан намын бүлгийн дарга Д.Эрдэнэбат, МАН-ын бүлгийн дарга С.Бямбацогт, МАХН-МҮАН-ын “Шударга ёс” эвслийн бүлгийн дарга Н.Батцэрэг нар оролцов.

УИХ-ын гишүүнийг Засгийн газрын гишүүнээр давхар томилдог явдлыг зогсоох хэрэгтэй. Ганцхан Ерөнхий сайд УИХ-ын гишүүн байна

Монгол Улсын Ерөнхийлөгч уулзалтын үеэр хоёр бүлэг зүйлийг онцолсон юм. Нэгд, Засгийн газрын шинээр томилуулахаар оруулж ирэх сайд нар УИХ-ын гишүүн биш байх тухай байр сууриа илэрхийлэх хэрэгтэй гэсэн чиглэл өгөв. Монгол Улсын Ерөнхийлөгч хэлэхдээ “Энэ талаар УИХ дахь МАН-ын бүлгийн байр суурь тодорхой байгаа гэж бүлгийн дарга С.Бямбацогт сая хэллээ. Засгийн газрын бүтцийн тухай хуулийг харахад долоон сайд өөрчлөгдөж, дөрвөн сайдыг шинээр томилох тухай асуудал яригдах юм байна. Хариуцлагатай холбоотой асуудал, бие биедээ хяналт тавих боломжийг бид нар энэ цаг мөчөөс эхэлж бүрдүүлэх хэрэгтэй. Энэ цаг мөчөөс эхлэн УИХ-ын гишүүнийг Засгийн газрын гишүүнээр давхар томилдог явдлыг зогсоох хэрэгтэй.

УИХ дээр яригдаж байгаа үндсэн чиг үүргийн яамдыг УИХ-ын гишүүн толгойлж болно гэсэн асуудлыг би тийм байх шаардлагагүй гэж  үзэж байгаа. Миний оруулах хууль бол Засгийн газрын гишүүн болгон УИХ-ын гишүүн байх шаардлагагүй, энэ хоёр ажлыг хавсарч болохгүй гэсэн байр суурьтайгаар оруулна. Ганцхан Ерөнхий сайд УИХ-ын гишүүн байна. Би ч Ерөнхий сайдаар өмнө нь ажиллаж байхдаа УИХ-ын гишүүн биш байсан. Тэгж ажиллаж болдог. Бид өмнө нь явж байсан нөхцөл байдлуудаа харж дүгнэж байгаад ерөнхий зарчим ярих ёстой.

Манай зарим дарга нар хэвлэлд өгсөн ярилцлагадаа “Байгаа хуулиараа явна. Түүгээрээ шийднэ” гэж байгаа. Бид одоо яг зарчмаа яриад энэ цаг мөчөөс эхэлж хэрэгжүүлээд явъя. Ийм боломж байгаа. Энд бүрэн хаалттай юм уу, огт болохгүй хуулиар хориглосон зүйл байхгүй. Бүлэг дээр хуулиудтай холбоотой мэдээллээ хийгээд Засгийн газрын шинээр томилогдох гишүүн УИХ-ын гишүүн биш байх талаар бүлгүүд өнөөдрийн дотор багтаж байр сууриа илэрхийлээч гэсэн ийм хүсэлтийг би тавьж байгаа юм. Та бүхэн бүлгүүдээ хуралдуулж энэ асуудлыг яриагүй нь яриад илэрхийлэх хэрэгтэй. Бүгдээрээ дахин дахин ярилцаад шийдье. Нэмж хэлэхэд шинээр томилогдох сайд нар УИХ-ын гишүүн биш байх тухай асуудлаар надад УИХ-ын дарга, Ерөнхий сайдтай ч ярьсан зүйл бий. Тийм учраас “Энэ бол Ерөнхий сайдын эрх мэдлийн асуудал. Орж ирэхээр нь ярья” гэсэн янз бүрийн өнгөлөн далдлалт хэрэггүй. Бүлгүүд үүн дээр албан ёсныхоо байр суурийг илэрхийлээрэй. Бүлгүүд байр сууриа илэрхийлээд, Ерөнхийлөгч энэ талаар ярьсан байхад Ерөнхий сайд ч шинээр оруулж ирэх Засгийн газрын гишүүдээ уг бодлогод нийцүүлж оруулж ирэх чиглэлд ажиллах боломжтой” гэлээ.

Ерөнхийлөгчийн зүгээс анхаарч байгаа хуулийн төслүүдийг танилцуулав

Монгол Улсын Ерөнхийлөгчийн хөндсөн хоёр дахь бүлэг асуудал нь энэ намрын чуулганы ач холбогдол болон Төрийн тэргүүний зүгээс анхаарч буй хуулийн төслүүдтэй холбоотой байв. Монгол Улсын Ерөнхийлөгч “Энэ удаагийн намрын чуулган бол олон чухал асуудал шийдэх маш их ач холбогдолтой чуулган. УИХ-ын үйл ажиллагаагаа талаасаа өнгөрч байна. Монгол Улсын Ерөнхийлөгчийн зүгээс анхаарч байгаа хуулиудаас та бүхэнд хэлье. Өргөн барьсан хуулийн төслүүдийн хувьд Төрийн аж ахуйн үйл ажиллагааг хязгаарлах тухай хуулийн төсөл гэж Ухаалаг төрийн тухай ярих үед гаргасан төслийг өнгөрсөн нэгдүгээр сард өргөн барьсан. Үүнийг хэлэлцэж баталж өгөх шаардлагатай байна. Нийтийн сонсголын тухай, Өрийн удирдлагын тухай, Баялгийн сангийн тухай зэрэг хуулийн төслийг өргөн бариад байна.

Энэ удаагийн чуулганаар Гэмт хэргийн тухай, Зөрчлийн тухай, Хууль сахиулагчийн эрх зүйн байдлын тухай, Гэмт хэрэг шүүхэд хянан шийдвэрлэх тухай зэрэг хуулийн төслүүдийг цаг гаргаж шийдвэрлэвэл зүгээр.

Өргөн барихад бэлэн болсон хуулиудын талаар бас мэдээлэл өгье. Төрийн сонгогдсон болон томилогдсон албан тушаалтны хариуцлагын тухай,Захиргааны ерөнхий хууль, Нийтийн зар мэдээний тухай, Төрийн буюу нийтийн албаны тухай зжэрэг хуулийн төслийг өргөн барих гэж байна.

Өргөн барих гэж байгаа хэд хэдэн хуулийн төсөл байна. Хүүхэд харах үйлчилгээний тухай хуулийн төсөл өргөн барихад бэлэн болсон. Иргэн харьяатын тухай хуулийн төсөл дээр ажиллаж байна. Өмчийн эрхийн тухай, Төрийн аж ахуйн үйл ажиллагааны тухай, Бараа, үйлчилгээ худалдан авалтын тухай, Улс төрийн намуудын тухай зэрэг хуулиудын төсөл эдгээрт багтаж байгаа.

Улс төрийн намуудын тухай хуулийн төсөл нь Улс төрийн намуудын тухай, Улс төрийн намын санхүүжилтийн тухай, Улс төрийн сангийн тухай гэсэн гурван багц хуулиас бүрдэж байгаа. Улстөржилт оруулахгүй тулд энэ багц хуулийг Ерөнхийлөгч өргөн барьсан нь дээр байх. Засгийн газрын тухай хуульд нэмэлт, өөрчлөлт оруулах тухай хуулийн төсөл нь УИХ-ын гишүүн, Засгийн газрын гишүүний үүрэгт ажлыг салгахтай холбоотой төсөл юм. Үүнийг УИХ батлаагүй. Тийм учраас үүнийг өргөн барихаар төлөвлөж байгаа” гэв.

Мөн гурван асуудлыг маш хурдан хэлэлцэж шийдэх хэрэгтэй гэсэн юм. Нэгдүгээрт, өргөн бариад байгаа Сонгуулийн тухай хуулийн төсөл. Мөн Хөгжлийн бодлого, зорилтын тухай хуулийн төсөл, үүнтэй уялдуулж Засгийн газрын бүтэц, бүрэлдэхүүний тухай хуулийн төслийг Ерөнхийлөгч, Засгийн газраас санал аваад өргөн баривал зүгээр. Эдгээр нь суурь хуулиуд байх юм гэв.

Намрын чуулганаар ирэх жилийн улсын нэгдсэн төсөв, Мөнгөний бодлогод хариуцлагатай хандаж шийдэхийг хүслээ.