Хяналтын байгууллагуудаас гаргасан акт, дүгнэлтүүд тэр бүр хэрэгжихгүй байна. Ялангуяа Мэргэжлийн хяналтын байцаагч нарын хийсэн хяналт шалгалтын зарим актууд усанд хаясан чулуу шиг ор сураггүй болох нь энүүхэнд. Барилгын салбарт ийм үзэгдэл нэлээд газар авсан тухай эх сурвалжууд хэлдэг. Мөн хөдөө аж ахуйд мөн иймэрхүү янзтай байгаа ажээ. Өнгөрсөн өвөл, хаваржин зарим аймгуудад гарсан малын гоц халдварт шүлхий өвчинтэй тэмцэх их ажлын үеэр нэгэн ноцтой зөрчил илэрсэн нь их хэмжээний вакцин хөлдөж, улсад томоохон хохирол учирсан явдал байлаа. Говьсүмбэр зэрэг аймагт очиж ажилласан УМХЕГ-ын улсын байцаагчид нь “Вакцин хадгалах хүйтэн хэлхээний иж бүрдэл багаж тоног төхөөрөмж нийлүүлэх гэрээ” гэгчээс үүсэлтэй зөрчлүүдийг илрүүлсэн байв. Энэхүү гэрээг дүгнэсэн актыг нь 2012 оны 11 дүгээр сарын 27-нд ҮХААЯ-ны Төрийн нарийн бичгийн даргын үүргийг түр орлон гүйцэтгэж байсан /одоо энэ албан тушаалдаа жинхлээд ажиллаж байгаа/ Х.Золжаргал гарын үсэг зурж баталгаажуулжээ. Актанд дурьдсанаар бол Улаанбаатар хотын мал эмнэлэгийн газар, 21 аймаг, Биокомбинат зэрэгт вакциныг 100 хувь нийлүүлсэн гэж байгаа. Гэвч шүлхий өвчин ид хүчээ авч, олон зуун мал үхэж үрэгдэж эхлэхэд вакин нь хэдийнээ хөлдөж ашиглах боломжгүй болсон байлаа. Иймээс улсын байцаагч нар дээрх тоног төхөөрөмжүүдийг захиалагч буюу Мал эмнэлэгийн үржлийн газар болон гүйцэтгэгчээр шалгарсан гэх “Төгс үчинбэр” ХХК нь 2012 онд вакцин хадгалах хөргүүрийг албан ёсоор хүлээлгэн өгөөгүй мөртлөө "...чанарын шаардлага хангасан вакцин хадгалах хүйтэн хэлхээний иж бүрдэл багаж, тоног төхөөрөмжийг нийлүүлж, үүргээ биелүүлсэн гэж дүгнэсэн нь бодит байдалд нийцэхгүй байна” гэжээ. Үүний дагуу Улсын мэргэжлийн хяналтын ерөнхий газрын даргын зөвлөл хуралдаж “Тендерийн захиалагч Мал эмнэлэгийн үржлийн газар нь Хэнтий, Сүхбаатар, Дорнод, Дорноговь, Говьсүмбэр аймгуудэд тоног төхөөрөмж вакцин хадгалах хөргүүрийг албан ёсоор хүлээлгэж өгөөгүй байв. Ашиглах зааврыг ч өгөөгүй. Мэргэжилтнүүд нь очиж сургалт зохион байгуулах байсан ч зохион байгуулаагүй. Гэрээний үүргээ биелүүлээгүй байхад “Төгс үчинбэр” компанийн гэрээг дүгнэсэн нь вакцин чанараа алдах, улсад их хэмжээний хохирол учрах нөхцөл болжээ. Говьсүмбэрт 1451.2 л буюу 725.6 мянган тун вакцин хөлдөж улсад 317.2 төгрөгийн хохирол учирсан...” гээд “Тендерийн гүйцэтгэл, гэрээ дүгнэсэн байдлыг хуулийн байгууллагаар шалгуулах нь зүйтэй” гэжээ. Гэвч хэргийн гол эздийг одоо болтол нарийвчлан шалгаагүй байна. Тухайн үед Мал эмнэлэг үржлийн газрын ганц хоёр хүнийг ажлаас чөлөөлсөн болоод л өнгөрчээ. Зүй нь хуурамч бичиг баримт үйлдэж, түүнийг нь нягталж шалгалгүй гарын үсэг зурсан Үйлдвэр, хөдөө аж ахуйн яамны төрийн нарийн бичгийн дарга Х.Золжаргал болон “Төгс үчинбэр”-ийн удирдлагуудад хуулийн хариуцлага тооцож, улсад учирсан хохирлыг барагдуулах учиртай байв. Х.Золжаргалын хувьд “Вакцин хадгалах хүйтэн хэлхээний иж бүрдэл багаж тоног төхөөрөмж нийлүүлэх“ тендерийн үнэлгээний хорооны бүрэлдэхүүнийг өөрчилсөн тушаал гарган МЭҮГ-ын дэд дарга, Мал эмнэлэгийн хэлтсийн дарга Т.Баатарыг Монголын мал эмнэлэгийн холбооны дэд ерөнхийлөгч П.Болортуяагаар сольсон байсан нь бас анхаарал татаж байна. Энэ нь албан тушаалтнуудын далд хуйвалдааны нэг хэлбэр ч байж болох аж. Эцсийн дүнд улсын төсвийн хөрөнгө иймэрхүү байдлаар сүйтгэгдэж, эрх мэдэлтэнгүүд ямар нэг хариуцлага үүрэхгүй өнгөрсөөр байх гэж үү.
Б.Отгонбаяр Эх сурвалж tumen.mn
