МҮОНТ-ийн олон ангит “Хэцүү анги” киноны гол дүрээр үзэгчдэд танил болсон жүжигчин А.Ганчимэг их сургуулиа төгссөн даруйдаа Улсын драмын эрдмийн театрт харьяалагдаж эхэлсэн түүхтэй. Театрынхаа залуу уран бүтээлчдийн төлөөлөл болж, авьяас чадвараараа хэнээс ч дутахааргүй гэдгээ богино хугацаанд харуулан “Тэнгэрийн хүү”, “Гамлет” зэрэг томоохон жүжгийн гол дүрд тоглосон тэрбээр өнгөрсөн жилийн намар ажлаа хүлээлгэж өгсөн билээ.
Гавьяат жүжигчин У.Уранчимэг, Соёлын тэргүүний ажилтан Д.Ганцэцэг нартай хамт “Зэрлэг цэцэгсийн хүлэмж” уран сайхны кинонд тоглосноор театраа орхиод байгаа А.Ганчимэг өдгөө “Хувьсал” продакшны уран бүтээлч гэгдэж яваа. Гэтэл түүнийг театрын ажлаа албан ёсоор хүлээлгэж өгөөд нэлээд хэдэн сар болсны дараа “Тэнгэрийн хүү” жүжигт тоглож байх үед нь хийгдсэн нэгэн сурталчилгааны хэсгээс татаж авсан хагас нүцгэн зургууд цахим ертөнцөөр тархаж олныг шуугиулсан.
Ихэнх хүмүүс энэхүү зургийг тун таагүй хүлээж авсан бөгөөд “УДЭТ-ынхан аль хэдийнэ хуучирсан “Тэнгэрийн хүү” жүжгээ рекламдахын тулд ингэж халагдсан жүжигчнийхээ хагас нүцгэн зургийг тараах хэрэг байна уу” хэмээн шүүмжилж байсан билээ. Үнэхээр тус театрын хувьд “Түүхэн жүжгийн өдрүүд”-ийнхээ хүрээнд “Тэнгэрийн хүү”-г үзэгчдийн хүртээл болгохоор зэхэж байхдаа ийнхүү увайгүй зан гаргасан төдийгүй жүжигчин А.Ганчимэгийн тоглож байсан дүрийг Г.Отгонцэцэгт өгчээ. Хаа очиж хагас нүцгэн зураг, эротик дүрүүдээрээ “алдартай” жүжигчин бүсгүй түүнээс ч илүү гэдгээ харуулах шиг бардам нүцгэлсэн гэнэ дээ.
Б.Содон
