Одоогоос хэдэн жилийн өмнө Өвөрхангай аймгийн Хорхорин суманд Эрдэнэзуу хийдийн өмнө шинээр босгосон “Боов хөшөө”-ний эздийг энэ “юм”-аа буцааж авахыг эздэд нь шаардаж олон жил хэл ам хийсэн. Учир нь шинэ хөшөө боссон цагаасаа эхлэн нутгийн олны нүүрийг улалзуулж, хол ойрын явуулын хүмүүсийн амны зугаа боллоо. Хархоринчууд “Нэг өглөө сэрэхэд л Эрдэнэзуугийн өмнөх дэнж дээр ийм хөшөө босчихсон байсан” гэж ярьцгааж байна. Нутгийн иргэдийн олж мэдснээр хөшөөг БОАЖЯ-ны Аялал жуулчлалын газрын даргаар ажиллаж байсан Ц.Оргодол, “Монгол 3000” компанийн захирал Ц.Соёмбо нар хийсэн бөгөөд 50 гаруй сая төгрөгөөр “шинэ боов” бүтээжээ. Өндөр үнээр бүтсэн гэх уг хөшөө нь дотоод гадаадын жуулчдын сонирхлыг татаж, орон нутгийн төсөвт орлого оруулах нь бүү хэл тус нутгийнхныг нүүрээ хийх газаргүй болгож, эвгүй байдалд оруулж байна гэж дургүйцэх хүмүүс олон гарч байлаа. “Шинэ боов”-ыг Хархориноор дайран өнгөрч буй баруун чиглэлийн бүх машины жолооч, зорчигч саатан үздэг аж. Мөн гадаадын жуулчид ч энд саатаж, баахан инээлдэж, зураг хөргийг нь дарж байгаад буцдаг байжээ. Уг нь хөшөөний анхны эх загвар буюу хуучин хөшөө нь үүнээс холгүй, уулын багахан аманд байдаг бөгөөд ард түмний дунд “Боов хад” хэмээн нэрлэгдсэн уг хөшөөнд орон нутгийнхан, хол ойрын мөргөлчид очиж үр хүүхэд, эмэгтэйчүүд хань ижил гуйдаг байжээ. Харин сүүлд гэнэт “боссон” шинэ хөшөөний суурийн хэсэгт “Чингисийн монгол эрчүүддээ зориулав” хэмээн бичсэн нь өмнөхөөсөө огт өөр билэгдэл, утга агуулгатай хэмээн нутгийнхан нь үзэж, Хууль зүй, дотоод хэргийн яамны дэргэдэх Эротикийн зөвлөл хуралдан, уг хөшөөг садар самууныг сурталчилсан агуулгатай байна гэж үзэн, албадан буулгах шийдвэр гаргасан байна. Уг хөшөөг санаачилан, санхүүжүүлсэн иргэн Н.Оргодол боов хадаа өөрийн зуслангийн хашаандаа байрлуулсан гэнэ.