Жолооч нарын хариуцлага өнөөдрөөс нэмэгдэж байна. Өөрөөр хэлбэл өнөөдрөөс эхлэн Замын хөдөлгөөний торгуулийн тухай шинэ хууль 2024 оны нэгдүгээр сарын 1-ний өдрөөс хэрэгжиж эхлээд байна. Энэ хуулийн хүрээнд торгуулиа 15 хоногийн хугацаанд төлөөгүй бол 50 хүртэл хувиар нэмнэ. Төлөхгүй бол хөдөлгөөнд орох эрхийг хязгаарлах цаашлаад нийтэд тустай ажил хийлгэж торгуулийг төлүүлэх заалттай. Мөн энэ сарын 8-ны өдрөөс эхлэн торгуулиа төлөөгүй, автомашины үзлэг оношилгоонд ороогүй, зогсоолын төлбөрөө төлөөгүй автомашиныг замын хөдөлгөөнд оролцуулахгүй байх шийдвэр гарсан билээ.
Торгуулиа төлөөгүй хүн тээврийн хэрэгслийн эзэмшигчийг солих боломжгүй болсон. Мөн жолоодох эрхийн үнэмлэх нөхөн авах, сунгах, ангилал нэмэх боломжгүй болно. Харин 15 хоногийн хугацаандаа торгуулиа төлбөл 50 хувь хөнгөрүүлэхээр заажээ.
Өнгөрсөн онд замын хөдөлгөөний дүрэм зөрчсөн 50-иас дээш удаагийн үйлдэлтэй 3,000 гаруй жолоочийн төлөөгүй торгуулийн хэмжээ 4 тэрбум төгрөгт хүрсэн аж. Үүнтэй холбоотойгоор замын хөдөлгөөний торгуулийн тухай шинэ хууль 2024 оны нэгдүгээр сарын 1-ний өдрөөс хэрэгжихээр баталсан билээ. Автомашины торгуулиа төлөөгүй жолооч нарыг замын хөдөлгөөнд оролцуулахгүй байснаар түгжрэл 10 хувь буурна гэж тооцоолсон байна.
