Ерээд оноос хойш төрийн бус байгууллагууд борооны дараах мөөг лугаа олширч энд тэндгүй “Иргэний дуу хоолой”, “Ард түмний шаардлага”, “Газар шороогоо луйварчдаас хамгаална” гэх мэт зүсэн бүрийн өнгө аясаар дуугарч байгаа билээ. Ардчилсан хувьсгалаар иргэд үгээ хэлэх эрх, эрх чөлөөг олж авсан болохоор арга ч үгүй биз. Гэхдээ хэлэх үгэнд бас учир бий. Бусдыг гүтгэж, нэр төрд халдах эрх хэнд ч байхгүй.
Ашигт малтмалын лиценз гэгч алга дарам цаас олж авсан гадаад, дотоодын компаниуд ч үнэндээ дэндүү дураараа дургиж, байгаль орчныг сүйтгэсээр байна. Харин соотон ноход чимээнээр гэдэг шиг байгалийн сүйтгэлийн ул үндэсийг бүрэн гүйцэд ололгүй, улс төрийн хүрээний зарим нэг хонзогногч этгээд болон сонгуулиар хувьдаа бага сага “оноо” цуглуулах санаатай эх орончийн дүр эсгэгчийн захиалгаар хэнд ч хэрэггүй шал дэмий үг дуугарах нь иргэний байгууллагуудын нэр хүндийг бас ихээхэн сэвтүүлж буй аж.
Саяхан “Босоо хөх Монгол” төрийн бус байгууллагын гишүүн Б.Банзрагч гэдэг залуу мэргэжлийн сумогийн их аварга, Асашёорюү Д.Дагвадоржийг гүтгэн цахим ертөнцөөр хэд хоногийн турш лайв хийж, тасралтгүй “бөмбөгдөв”. Тэгэхдээ эх адаггүй баахан л юм ярив. Ерөнхийд нь аваад үзвэл тэрээр “Аса аваргад бид нутгаа ухуулахгүй” гэжээ. Түүний хэлээд байгаагаар бол Асашёорюү Д.Дагвадорж нь 2010 оны 10 дугаар сарын 6-ны өдрөөс эхлэн өнөөг хүртэл Архангай аймгийн Өндөр-Улаан сумын Азарга багийн нутагт ураны хайгуул хийж, улмаар ухаж ашиглаж байгаа юм гэнэ.
Цахим сүлжээнд тийнхүү мэдээлж, нутгаа ухуулахгүй хэмээн цээжээ дэлсэх Б.Банзрагчийн талаар нэрээ ил гаргахаас айж болгоомжилсон нэгэн баттай сурвалж харин “Наадах чинь УИХ-ын гишүүн Г.Тэмүүлэнгийн хорлонтой явуулгаар ийм сонин юм яриад яваа нөхөр. “Босоо хөх Монгол” Төрийн бус байгууллагын гишүүн юм гэсэн. Гэхдээ гишүүн мөн эсэхийг бүү мэд. Харин Г.Тэмүүлэн гишүүн 2020 оны сонгуулиар Архангай аймагт нэр дэвших нь үнэн байх. 2016 оны сонгуулиар түүний ээж нь хүүгээ дэмжиж намдаа 300 сая төгрөг хандивлаж байсан” гэлээ. Түүнчлэн Б.Банзрагч нь МАН-ын дэргэдэх Нийгмийн ардчилал, Монголын залуучуудын холбооны 96 жилийн ойн баярын рекламын өнгөт, том зураг дээр УИХ-ын гишүүн Г.Тэмүүлэнтэй хамт алхаж яваа дүр дөрхийг харсан хэн ч гэсэн тэдний ойр дотно харилцаатайг төвөггүй ойлгох ажээ.
Тэгвэл саяхан Асашёорюү Д.Дагвадорж өөрийн цахим хуудсаар дамжуулан тайлбар хийлээ. Тэрээр “Чин үнэндээ надад дургүй хүн зөндөө л байгаа. Харин тэр хүмүүс хэзээ ч намайг хараагүй, үзээгүй хүмүүс. Үзсэн бол өнгөр бодолтой хүмүүс. Архангай аймаг миний ээжийн нутаг. Эхийнхээ хэвлийгээс төрж бойжсон хүн ээжийнхээ нутгийг ухаж бусниулах уу. Миний бодол тийм зүйлтэй эвлэрэхгүй. Хүн насны нэг л жаран...Буцаад бид бүгдээрээ газартаа шингээд алга болно. Тэрийг би, бид бүгдээрээ бодох л хэрэгтэй” гэсэн байна.
УИХ-ын гишүүн Г.Тэмүүлэн “Босоо хөх Монгол” Төрийн бус байгууллагын гишүүн Б.Банзрагчийг ашиглан цахим сүлжээнд хэдэн өдрийн турш лайв хийлгэж, баруун солгойгүй баахан буруулсан нь сүүлдээ Асашёорюү Д.Дагвадоржийн дээрх тайлбараар бүхэлдээ няцаагдаж буй ажээ. Асашёорюү Д.Дагвадоржийн эсрэг захиалгаар тийнхүү ажиллуулсныхаа хөлсөнд чухам хэдийг төлсөн нь одоогоор тодорхой бус байна.
