Шинэ Засгийн газарт Боловсролын сайдаар УИХ-ын гишүүн Л.Энх-Амгалан ажиллаж буй. Сайдын тамга гардаад удаагүй байгаа Л.Энх-Амгалан 10 сая төгрөгөөс дээш төлбөртэй хувийн сургуулиудад хувьсах зардал олгохгүй гэдгээ мэдэгдэв. Сайдын энэхүү байр суурийг иргэд олон нийт янз бүрээр хүлээн авч байна. Уг нь бол 10 сая төгрөгийн төлбөр авч байгаа сургуульд төрөөс хувьсах зардал өгөх шаардлага байхгүй. Энэ утгаараа Л.Энх-Амгалан сайдын зөв. Тэвчиж болох зардал ч гэж байдаг. Үүгээр ч зогсохгүй хувийн сургууль бол бизнесийн л байгууллага. Тиймээс төрөөс зардал чирэгдэл болох хэрэггүй мэт.
Гэхдээ ерөнхий боловсролын сургуулиуд ачааллаа дийлэхгүй, гурван ээлжээр хичээллэж байгаа нөхцөлд хувийн сургуулиуд энэ ачааг хөнгөлж өгч байгаа нь үнэн. Ерөөсөө аль ч талаараа суурь боловсролын тогтолцоонд хамаагүй халдаж болохгүй. Энд л Монгол Улсын ирээдүй байгааг мартаж болохгүй. Ерөөсөө боловсролын салбар бол өөрөө маш эмзэг учраас хянуур бодлоготой хандах хэрэгтэй байх.
Үүнээс гадна “Хүүхэд бүр сурах эрхтэй” хэмээн Үндсэн хуульдаа зааж, бүх хүүхдэд ерөнхий боловсролыг үнэгүй олгодог тогтолцоотой юм. Гэтэл “хувийн сургуульд хувьсах зардал өгөхгүй” хэмээн салбарын сайдын мэдэгдэж байгаа нь зөв үү, буруу юу. Түүний хэлж байгаагаас харахад таван сая төгрөг хүртэл төлбөртэй 106 сургууль, 5-10 сая төгрөгийн төлбөртэй 12 сургууль, 10 сая төгрөгөөс дээш төлбөртэй найман сургууль байгаа аж. Үүнээс харахад 126 хувийн сургуульд дундажаар 100 орчим мянган хүүхэд суралцаж байна гэсэн үг. Энэ нь төрийн өмчийн сургуулиудын ачааллын 20 шахам хувь болно гэхээр чамгүй өндөр ачааллыг хувийн сургуулиуд хөнгөлж өгч байгааг мартаж болохгүй. Нөгөө талаар бидний байгуулсан нийгмийн үнэт зүйл гэж юм бий. Бүх зүйлийг засаглаж болохгүй нийгэмд амьдарч байна. Мөн эцэг эхчүүд хүүхэддээ хаанаас ямар боловсрол олгох нь тэдний эрх. Мэдээжийн хэрэг 10 сая төгрөгөөс дээш төлбөртэй сургуульд хөрөнгөлөг хүн л хүүхдээ сургана. Эгэл жирийн, орлого багатай иргэд чадахгүй. Тэгэхээр Л.Энх-Амгалан сайд энэхүү байр сууриа маш сайн тайлбарлах ёстой болж байна.
Tumen.mn
