Засгийн газар 2015 оны улсын төсвийн тухай хуулийн төслөө УИХ-д өргөн бариад байна. Энэ төсөлд 3 онцлог бий гэдгийг Сангийн сайд Ч.Улаан онцлов. 

Тодруулбал, Орон нутаг, анхан шатанд төсвийн эрх мэдэл, үүрэг хариуцлагыг цогцоор нь шилжүүлж байна. Хоёрт, энэ онд цалин тэтгэвэр, тэтгэмжийг нэмэгдүүлэхэд зарцуулсан хөрөнгийг ирэх онд 2,5 дахин буюу 500 тэрбум төгрөгөөр нэмэгдүүлнэ. Энэ зорилтыг салбарын онцлогийг харгалзан инфляцид сөрөг нөлөө үзүүлэхгүйгээр үе шаттай хэрэгжүүлнэ. Гуравт, төсвийн гадуур зардал буюу Чингис бонд, Хөгжлийн банк, хөнгөлөлттэй зээлийн хөрөнгийн эх үүсвэрийг Улсын төсөвт нэгтгэж хуулийн төсөлд оруулжээ.

Шилэн дансны тухай хуулийг хэрэгжүүлж, төсвийн хэрэгжилтэд хяналт тавих нөхцөлийг бий болгож, ард иргэдийн хяналтад ажиллах юм. Мөн ирэх оны төсөвт ямар ч татвар нэмэгдэхгүй, шинээр татвар бий болохгүй гэдгийг ч чухалчлав.

Ирэх жил 7,2 их наяд төгрөгийн орлого төвлөрнө. 8,4 их наяд төгрөгийн зарлага санхүүжигдэнэ. Бүтээн байгуулалтын ажлууд үргэлжилнэ, нийгмийн хөгжилд зориулсан хөрөнгө оруулалт нэмэгдэж байгаа  ажээ. 

Харин цалин, тэтгэврийг яг хэдэн хувиар нэмэх талаар Ч.Улаан "Өнгөрсөн жил цалин, тэтгэврийг нэмэгдүүлэхэд 200 тэрбум төгрөгийг нэмж зарцуулсан. Харин ирэх жил 500 тэрбум төгрөгийг нэмж зарцуулна. Өөрөөр хэлбэл, нэмж зарцуулж байгаа хөрөнгийн хэмжээ 2.5 дахин нэмэгдэж байгаа. Цалин, тэтгэврийг яг хэдэн хувиар нэмэхийг одоохондоо хэлэх боломжгүй. Учир нь салбарын онцлогийг харгалзан үзэж дээр нь үе шат, дэс дараатайгаар цаг хугацааны хувьд ялгавартайгаар хийх ажил юм. Энэ бодлоготой уялдуулан ирэх оны дундуур нэмэгдүүлнэ" гэсэн юм.

Х.Даваа