Манай улсын урд хөрш БНХАУ-ын амьтны эрхийг хамгаалагчид баруун өмнөд нутагт жил бүр болдог нохойн мах идэх баярыг таслан зогсоохыг хүссэн өргөх бичигт 11 сая гаруй хүний гарын үсгийг цуглуулжээ. Тус улсын Юлин хотод болдог нохойн мах идэх баяр нь жил бүрийн зургаадугаар сарын сүүлээр болдог юм. Амьтны эрхийг хамгаалагч идэвхтэнүүд уг баярыг амьтдад хүнлэг бусаар ханддаг учир цаашид томдэглэх шаардлагагүй хэмээн үзэж буй.

Засгийн газарт өргөх бичиг барих, хүмүүсийн гарын үсгийг цуглуулах арга хэмжээг 24 идэвхтэн хамтран зохион байгуулж байгаа бөгөөд "Би хоол биш" гэсэн бичиг бүхий амьтдын зурагтай зурагт хуудас барин сурталчилгааны ажил явуулж байгаа юм байна. Энэ сарын 21-нд эхлэх нохойн мах идэх баярын үеэр хүмүүсийн хэрэглээнд зориулж, хэдэн мянган нохойг төхөөрөх юм.

Вашингтон Пост сонинд гарсан судалгаанаас харахад Азид жил бүр 30 сая гаруй нохойг хүнсэнд хэрэглэдгийн гуравны нэгийг нь Хятадад төхөөрдөг гэнэ. Харин үүний тулд хэдэн мянган тэжээвэр нохойг хулгайлж, дамын наймаа хүчээ авдаг юм байна. Хүнлэг нийгэм олон улсын нийгэмлэгийнхэн Юлиний баярыг хар дарсан зүүд хэмээн тодорхойлжээ.

С.Дамдин