“Муу хүн чөлөөнөөр, чоно борооноор” гэгчээр эдийн засгийн байдал хүндэрч байгааг далимдуулан таксины үйлчилгээ эрхэлдэг компани, хувь хүмүүс иргэдээс дуртай үнээ хэлж, мөнгө нэхэх байдал газар авч эхэлжээ. Тухайлбал, нэг км газар яваад 1500-2000 төгрөг авах жишээтэй. Таксигаар ажилдаа ирэхэд дөрвөн км гарч, 2800 төгрөг төлөх ёстой. Гэтэл жолооч нар 3000, 3500, 5000 гэх зэрэг янз бүрийн тарифаар үйлчлэх юм. Энэ бол шударга бус байдал. Үүнд ямар ч хяналт байхгүй учир жолооч нар ингэж жолоогүй аашилж байна. Түүнчлэн 2013 онд ШӨХТГ-ын дарга асан О.Магнай таксины тарифыг нэмэх шийдвэр гаргаж, иргэдийн эсэргүүцэлтэй тулгарснаар хуучин хэвээр нь байлгахаар болсон билээ. Ингээд таксины үйлчилгээ эрхэлдэг компани, хувь хүн иргэдэд үйлчлэхдээ нэг км нь 700 төгрөг байхаар тогтсон. Гэвч энэ журам мөрдөгдөхгүй байгаагийн тод жишээ энэ юм. Өнгөрсөн жил нийслэлийн хэмжээнд багагүй хөрөнгө зарцуулж, найман цэгт таксины зогсоол байгуулсан. Харин иргэдийн хүсэлтийн дагуу шуурхай, чанартай үйлчилж байгаа эсэхэд авто тээврийн хяналтын байцаагч нар хяналт тавин ажиллахаар болсон. Гэтэл энэ ажил нь ямар ч үр дүнд хүрээгүйг хүн бүхэн мэднэ. Эл байдалд хяналт тавьж, үнийн тогтолцоог шийдвэрлэх газар бол ШӨХТГ болон Нийслэлийн тээврийн газар. Тэгэхээр холбогдох байгууллагууд иргэдийнхээ эрх ашгийг хамгаалж, дуртай үнээрээ иргэдэд үйлчилдэг даварсан таксины жолооч нарт хяналт тавьж, хариуцлага тооцох шаардлагтай байна.

Эх сурвалж: Unen.mn