МАХН-ын дэргэдэх ардчилал, шударга ёс, Монголын эмэгтэйчүүдийн холбооноос Монгол улсын Ерөнхийлөгчид хандан ил захидал илгээсэн байна.  Захидлыг бүрэн эхээр нь хүргэж байна.  

     Эрхэм хүндэт Ерөнхийлөгч Таны амар амгаланг айлтгая.

             Монголын эмэгтэйчүүд “улаан гэрийн сургууль”-иас улсын Ерөнхийлөгчид нэр дэвших хүртлээ туулсан бахархалт он жилүүдийн баяраа тэмдэглэж буй энэ өдрүүдэд Ардчилал, Шударга Ёс, Монголын Эмэгтэйчүүдийн Холбоо (АШЁМЭХ)-ны гишүүд, дэмжигчид бид Эрхэм Ерөнхийлөгч Танд хандан энэхүү ил захидлаа илгээж байна.

Эрхэм Ерөнхийлөгч Та өөрт олгогдсон эрх хэмжээнийхээ дагуу МАХН-ын дарга, Монгол улсын гуравдагч Ерөнхийлөгч Намбарын Энхбаярт “уучлал” үзүүлсэн явдалд намын журмын нөхөд, түүний дотор ардчиллын үнэт зүйлсийг эрхэмлэн дээдлэх, нийгэмд шударга ёс тогтоох, улс төрийн аливаа хэлмэгдүүлэлт гаргуулахгүйн төлөө тууштай тэмцэж ирсэн МАХН-ын эмэгтэйчүүд, эхчүүд бид  гүнээ талархаж явдагаа илэрхийлж байна.

 Засгийн эрхийг барилцаж буй нөлөө бүхий улс төрийн хүчин МАХН-ын дарга, Монгол Улсын Ерөнхийлөгч асан Намбарын Энхбаярын нэр төр, хувь хүнийх нь эрхэнд бүдүүлэгээр халдах явдал сүүлийн үед хирээс хэтэрч улсын хил даван Монгол улсын нэр хүнд, гадаад орнуудтай харилцах харилцаанд харшилж  эхэллээ.

  Энэхүү улс төрийн эрээ цээргүй гүтгэлэг нь биеийн эрүүл мэнд нь сайнгүй байгаа Н.Энхбаяр даргад төдийгүй түүний гэр бүл, үр хүүхэд,  аав, ээж,  журмын нөхдөд нь хүндээр тусч байгаа нь мэдээж билээ.   

“Монголын төр зүтгэсэн хүндээ хатуурхаж болохгүй. Монгол төрийн үе үеийн зүтгэлтнүүд хэлмэгдэж байсан түүх давтагдах ёсгүй” гэж эмэгтэйчүүд, эхчүүд бид үздэг.

Ерөнхийлөгч байх эрхэм хувь тохиол хүн бүхэнд олддоггүй. Энэхүү эрхэм дээд хувь тохиол Н.Энхбаяр Та хоёрт ижилхэн оногдсон байдаг. Ерөнхийлөгч байхын зовлон жаргалыг Ерөнхийлөгч хүн л сайн мэднэ.

Хүн хэдий сайн ч хэлэхээс нааш санахгүй гэдэг. Тийм ч учраас Эрхэм Ерөнхийлөгч Таныг төрийнхөө алтан жолоог шилжүүлэн авсан өмнөх Ерөнхийлөгчийнхөө нэр төр, хүний эрхийг хамгаалан үгээ хэлж, байр сууриа илэрхийлнэ хэмээн бид хүсэн хүлээж байна. Таны хэлсэн үг, баримталж буй байр суурь ардчилалын үнэт зүйлсийг хамгаалах,  хууль шүүхийн байгууллага, улс төрийн нам, төрийн бус байгууллага, нийт ард түмний эв нэгдлийн илэрхийлэл болж чадна.

Эрхэм Ерөнхийлөгч Таныг бидний хүсэлтийг хүлээн авч Монгол оронд үүсээд байгаа  хүний эрх, нэр төрд халдсан улс төрийн явуургүй үйл ажиллагааг таслан зогсоож МАХН-ын дарга, Монгол улсын гуравдагч ерөнхийлөгч Намбарын Энхбаярын Монгол эх орондоо ажиллаж амьдрах хэвийн нөхцлийг хангах талаар тодорхой алхам хийнэ гэж найдаж байгаагаа дахин илэрхийлье.

Таныг хүндэтгэсэн,

МАХН-ЫН ДЭРГЭДЭХ АРДЧИЛАЛ, ШУДАРГА ЁС,

МОНГОЛЫН ЭМЭГТЭЙЧҮҮДИЙН ХОЛБОО

                                             2014 оны 10 дугаар сарын 09-ний өдөр