МУГЖ С.Жавхлан Төрийн гурван өндөрлөгтэй халз мэтгэлцэх хүсэлтэй байгаагаа илэрхийлж, тэднийг мэтгэлцээнд дуудсан. Телевизийн эфирээр гаргахын тулд МҮОНТ-ийн захирал Ц.Оюундарьд хүсэлт явуулжээ. Үүнийх нь хариуд цаг өгсөн ч, мэтгэлцэгч талууд бүгд байх ёстой гэсэн шаардлагаа хангахгүй бол эфирийн цаг өгөхгүй гэсэн байгаа юм. Харамсалтай нь Төрийн гурван өндөрлөг С.Жавхлангийн хүссэнээр халз мэтгэлцээнд ирээгүй. Иймд тэд ч МҮОНТ-ээр гарч чадаагүй. Харин үүнийгээ залруулах гэсэн шиг өчигдөр ТВ9 телевизээр өөрсдийнхөө байр суурийг илэрхийллээ. “Төр буруутай юу”, “Түмэн олон буруутай юу” гэсэн асуултад эрх баригчдаас хариу авахыг хүссэн тэд улс орныг хөгжүүлэхэд юу саад болж байгаа, одоогийн эрх баригчдын алдаа, мөн МҮОНТ улстөрчдийн “халаасанд” хэрхэн орчихсон байгааг ам уралдан ярицгаалаа.
С.Жавхлан тэргүүлж, УИХ-ын гишүүн Б.Бат-Эрдэнэ, Г.Уянга, Ц.Даваасүрэн, Ц.Шинэбаяр гээд олон улстөрч үг хэлж байв. УИХ-ын гишүүн Б.Бат-Эрдэнийн хувьд Ноён уулыг аврахын төлөө олон дуугарсан. Гэвч үгийг нь хүлээж авдаггүй, хавчдаг мэтээр ярив. Залгуулаад УИХ-ын гишүүн Г.Уянга өнөөдрийн эрх баригчдын энэ байдлыг өөрчлөхөөр өөр аргагүй гэдгийг хэлж байлаа. Бие даагчдыг төлөөлсөн УИХ-ын гишүүн Ц.Даваасүрэн Монголд хоёр сонголт бийг тайлбарлалаа. Түүний хэлснээр нэгдүгээрт, тэмцэж, нэгдэж байж эрх баригчдыг зогсоох юм гэнэ. Харин хоёрдугаарт, ардчилсан сонгуулиар иргэд сонгогчид сонголтоороо шийдэх ёстой гэв. Мэдээж эхний хувилбар хэцүү гэдгийг тэр тодотгосон. Мөн МҮОНТ-ийг эрх баригчдын гар хөл болж дуугардаг болж, хоёр том нам хуваагаад авчихаж гэхчлэн ярьж байсан юм.
Тэдний хэлсэн үг, шүүмжлэл бүр хэн рүү чиглэв. Эрх баригчид, шийдвэр гаргагчдыг шүүмжилсэн. Шүүмжлэгчид дотор шийдвэр гаргагчдын төлөөлөл ч байсан гэдгийг бодох хэрэгтэй. С.Жавхлан тэргүүтэй улстөрчдийн энэ шүүмжлэл хэн нэгэн рүү чиглэсэн гэхээс илүүтэй өөрсдийгөө дөвийлгөх гэсэн өнгө аяс харагдаж байв. Бид хийх гэсэн боловч эрх баригчид хийлгэсэнгүй, бид ард түмний талд хэвээр байгаа гэх мэт үгс, үйлдэл мэт байлаа. Шүүмжлэл бүрийн цаана дараагийн сонгуулиар иргэд зөв сонголт хийх хэрэгтэй, магадгүй бид дараагийн сонголт чинь байж болох юм гэх санааг “шидсээр” байсан нь тэдний шүүмжлэлийн гол зорилготой гэлтэй.
Ц.Нандин
Эх сурвалж: Zaluu.com
