Төв талбай дахь эсэргүүцлийн жагсаал өнөөдөр ч үргэлжилсээр байна. Жагсаж буй иргэд алдагдсан боломж, хулгайлагдсан эх орны баялагийг нэхэж буй юм.

Мөн тэд төрд шургалсан дарга нарыг хүүхдүүдийг шалгуулах хүсэлтэй байгаагаа илэрхийлж байгаа билээ. Төрд хүүхдээ хамгийн эрэлт хэрэгцээтэй буюу гол албан тушаал дээр тавьж чадсан хэд хэдэн гишүүд одоогийн парламентэд бий.

Тухайлбал, Төрийн худалдан авах ажиллагааны газрын дарга Х.Улам-Өрнөхийг шалгахыг шаардаж байна. Эрүүл мэндийн сайд асан, УИХ-ын гишүүн Д.Сарангэрэлийн хүү Х.Улам-Өрнөхийн хувьд төрийн өмчит хуулийн этгээдүүдийн худалдан авах ажиллагааг хариуцаж байв. Өөрөөр хэлбэл, зарлагдах тендерүүдийг хариуцан зохион байгуулдаг гол алба болох Төрийн Худалдан авах ажиллагааны газрын даргаар ажиллаж байсан. Иймээс өнгөрсөн хугацаанд хийгдсэн төрөөс зарлагдсан тендерүүдийн булхай луйврын гол буруутан гэж үзэж байгаа аж.

Тэгвэл Х.Улам-Өрнөхийн хийсэн гэрээг нэг бүрчлэн шалгаж, хууль бус гэрээлсэн эсэх болон бусдад давуу байдал олгох замаар мөнгө завшсан байж болох тул шалгаж шударга ёсыг тогтоохыг шаардаж байна.