нийтлэсэн Admin
Өнгөрсөн жилийн дэлхийн аваргаас мөнгөн медаль хүртсэн манай буудлагын шигшээ баг энэ оны анхны олон улсын тэмцээндээ оролцохоор Кувейт улсыг зорилоо.
Манай тамирчдын цэц сорихоор зорьсон энэхүү тэмцээн ирэх 24-31-ний өдрүүдэд болох “Хааны нэрэмжит гран при” юм.
Дэлхийн шилдэг мэргэн буучид оролцдог уг тэмцээнд манай тамирчид анх удаа оролцох гэж байна. Багийн бүрэлдэхүүнд Хөдөлмөрийн баатар, Гавьяат тамирчин О.Гүндэгмаа, Олон улсын хэмжээний мастер Л.Уранзаяа, Э.Даваахүү, З.Батхуяг, Ч.Нарантуяа, З.Намдуун, Б.Намуунзул, Д.Лхагвасүрэн, Д.Лхамсүрэн нар багтжээ.
Энэ онд буудлагынхныг Рио Де Жанейрогийн олимпийн эрх олгох олон тэмцээн хүлээж байгаа. Ирэх дөрөвдүгээр сараас эхлэх Дэлхийн цомын дөрвөн цуврал тэмцээнд эхний хоёр байрт орсон тамирчид олимпийн эрх авах бол, арваннэгдүгээр сард болох Азийн аварга шалгаруулах тэмцээнээс медаль хүртсэн тохиолдолд олимпийн эрх авах боломжтой.
