Налайх дүүрэгт газ дэлбэрсний улмаас 16 настай А.Цэрэнтогтох, 8 сартай А.Амарболд нар ноцтой түлэгдсэн харамсалтай хэрэг гарсан билээ. Хоёр хүүд туслах хандивын аян хаа сайгүй өрнөж, хүн бүр эрвийх дэрвийхээрээ тусалж байгаа боловч хүүхдүүдэд зориулан цуглуулж байсан хандивын мөнгийг хулгайлсан хэрэг гарчээ.
Тодруулбал, хүүгийн суралцдаг англи хэлний сургалттай "ACCESS" хөтөлбөрийн сурагчид дөрвөн баг болж, оройн цагаар хөл хөдөлгөөн ихтэй, Үндэсний соёл амралтын хүрээлэн, Үндэсний цэцэрлэгт хүрээлэн зэргээр явж, дуулж бүжиглэн, хямд үнэтэй ном худалдсаар 3.6 сая төгрөгтэй болжээ.
Гэвч " Хүннү Молл" дээр хандив цуглуулаад буцах замдаа нэгэн таксинд сууж буухдаа нэг хайрцагтай хандивын мөнгөө мартаад буусан байна. Тухайн үед таксины жолооч эцэг, эхэд нь хэл дуулгасан боловч дотор нь байсан 100 орчим мянган төгрөгийг аваад эргэж холбоо бариагүй ажээ.
Энэ үед холбоо барьсан утсаар нь эргүүлэн залгахад "Сая нэг залуу миний тусаар гуйж ярьсан, би хөдөөнөөс орж ирсэн хүн байна" гэх хариуг өгчээ. Ингээд хандив цуглуулж байсан хүүхдүүд яахаа мэдэхгүй сандралдаж байх зуур багш нь санал болгосноор ШӨХТГ-т хандаж, замын камер шүүлгэн жолоочийг нь олж, мөнгөө буцаан авсан байна.
Одоогоор хоёр хүү Гэмтэл согог судлалын үндэсний төвийн Түлэнхийн төвд хэвтэн эмчлүүлж байгаа бөгөөд найман сартай хүүгийн бие өдрөөс өдөрт сайжирч байгаа бол ахынх биеийн 80 хувь нь түлэгдэлтэй, эхний ээлжинд хүмүүсийн өгсөн хандивын мөнгөөр гүн түлэгдсэн хэсэгт арьс нөхөх ажилбар хийсэн боловч шарх нь хэдийнэ элэг, ходоод, бөөр гэхчилэн дотор эрхтнүүдэд нь нөлөөлөөд эхэлжээ.
Гэхдээ хүүг аврах боломж бий. Хүүгийн эцэг, эх Солонгосын эмнэлэгтэй холбоо тогтоож, хүүгийнхээ зураг, эмнэлгийн тодорхойлолтыг явуулахад “Хүү эв эрүүл, сав саруул болно. Гоо сайхны хагалгаанд хүртэл оруулна” гэсэн хариу иржээ.
Тус эмчилгээний зардалд 350-400 сая орчим төгрөг шаардлагатай болох учраас хүүгийн ээж Эрүүл мэндийн сайд Г.Шийлэгдамба, УИХ-ын эмэгтэй гишүүдийн зөвлөл, Ерөнхийлөгч, Ерөнхий сайд нарт хандаад байгаа ч одоогоор хариу ирүүлээгүй байгаа аж.
Б.Хишигдэлгэр
