“Монгол шуудан” компанийн ажилтнууд өнөө өглөө төрийн ордны баруун талаар хойшоо явдаг замын хажууд эсэргүүцлийн жагсаал хийлээ.  Хэд хоногийн өмнөөс эхэлсэн тэдний тэмцэл мөддөө дуусахгүй бололтой. Төрийн өмчийн хорооноос  тус компанийн захирлаар Онцгой байдлын ерөнхий газраар ажиллаж байсан Т.Дуламдоржийг томилуулах болсон юм. Гэвч “Монгол шуудан” төрийн өмчит компанийн ТУЗ-ийн хурлаар түүнийг албан ёсоор хүлээн зөвшөөрөөгүй, зөвлөлийн хурал нь хууль, журмын дагуу явагдаагүй хэмээн ажилчид нь тийнхүү эсэргүүцэж буй аж. Тэгээд ч Т.Дуламдорж нь Онцгой байдлын ерөнхий газрын даргаар ажиллаж байхдаа нэлээд хэл аманд өртөж байжээ.

Т.Дуламдорж Онцгой байдлын ерөнхий газрын даргаар ажиллаж байхдаа аавынхаа төрсөн дүүгийн охин буюу авга эгч  Тогооням гэгчийгээ тус газрын өмч хөрөнгөнд хутгалдуулж, тендерийн маргаан үүсгүүлж байсан гэдэг. Тогоонямыг нь АТГ-аас “Ганц худаг”-т хорьж, шалгаж байсан бөгөөд одоо ч шалгалтын ажил бүрэн дуусаагүй  байгаа ажээ.

Мөн 2009 онд Гачууртад гал унтраах ангийн барилгыг 946 сая төгрөгөөр барихаар төлөвлөсөн байлаа. Гал унтраах хоёрхон машинтай энэ ангийн барилгад тухайн үедээ энэ нь хүрэлцэхүйц мөнгө байж. Гэтэл Т.Дуламдорж нар  даварч, мөнгө саах аргаа хайн уг барилгын санхүүжилтэнд  2014 оны улсын төсөвт 2,8 тэрбум төгрөг тусгуулахаар улайран зүтгэж байжээ.

Энэ мэтээс үзэхэд Т.Дуламдорж нь явсан газар болгондоо төрийн мөнгөөр тоглох сонирхолд  хөтлөгдсөн эр бололтой. Шадар сайд асан Д.Тэрбишдагвын туслахаар олон жил ажилласан гэдгээрээ мань эр гул барьж одоо Монгол шуудан” компанийг гартаа хийхээр улангасч, олон нийтийг ийнхүү бухимдуулж байгаа аж. Жагсагчид харин энэ өглөө 30-40 минут орчим лоозонгуудаа барин жагсаж байгаад ажилдаа явцгаажээ.

Б.Баяр 

Эх сурвалж: Tumen.mn