Канадын “Хан ресурс” компани өнгөрсөн гуравдугаар сард олон улсын арбитрийн шүүхээр ялалт байгуулж, манай улсаас 100 сая ам.долларын нөхөн олговрыг авахаар болсон.
Харин засгийн газрын зүгээс “Хан ресурс” компанийн эсрэг арбитрын шийдвэрийг хүчингүй болгуулах, шаардлагатай бусад арга хэмжээнүүдийг авч хэрэгжүүлнэ гэдгээ өнгөрсөн дөрөвдүгээр сарын сүүлээр албан ёсоор мэдэгдсэнээр асуудал тэгсгээд замхарсан.
Гэтэл “Хан ресурс” өнгөрсөн сарын 12-ны өдөр олон улсын Арбитрын шүүхээр тогтоосон нөхөн төлбөрийн шаардлагыг баталгаажуулах хүсэлтээ АНУ-ын Колумб мужийн шүүхэд гаргаснаа албан ёсоор мэдэгдээд амжсан билээ.
Тэгвэл ерөнхий сайд Ч.Сайханбилэг өнгөрсөн долоо хоногт АНУ-д айлчлах үеэрээ "Bloomberg"-т өгсөн ярилцлагадаа Монгол Улсын Засгийн газраас олон улсын арбитрын шүүхийн гаргасан шийдвэрийн дагуу Канадын уул уурхайн "Хан Ресурс" компанид 100 сая ам.долларын нөхөн олговорыг олгоно хэмээн мэдэгджээ.
Эндээс Монгол улсын нэр хүндийг гадны хөрөнгө оруулагчдын өмнө муу дүрээр харуулахад хүргээд байсан асуудал зөв тийшээ шийдэгдсэн мэт дүр зураг харагдаж байгаа юм. Гэсэн ч засгийн газрынхан танхимаараа хэлэлцэж, Хуульзүйн яамнаас албан ёсоор уг 100 сая ам.долларыг өгөхгүй байхад анхаарал хандуулна гэж зарлаж байсан нь саяхан.
Тэрхүү шийдвэрийг даган дэмжиж, хүүгийн тоолуур гүйж буйг юман чинээ бодохгүй явсан ерөнхий сайдЧ.Сайханбилэг гадны хэвлэлд ярилцлага өгөх болохоороо танхимын шийдвэрээсээ тэс өөр зүйл ярьсан нь анхаарал татаж байгаа юм.
Түүнчлэн айлчлалынхаа үеэр “Тавантолгойн асуудлыг манай УИХ хаврын чуулганаараа дэмжинэ гэдэгт итгэж байгаа” хэмээн бас нэгэн хэвлэлд цуурч орхисон. Гэтэл нөгөө талд Засгийн газраас гэрээгээ эргүүлэн татсан нь бас л хачирхалтай асуудал.
Тодруулж хэлбэл, Шийдлийн засгийн газрын шийдвэр сайд нарын түвшинд нэг өөрөөр, ерөнхий сайд Ч.Сайханбилэгийн хувьд бас нэг хувилбараар ойлгогддог гэмээр хошин хувилбар эндээс харагдаж байгаа юм.
Гадны хэвлэлүүдэд өгсөн ярилцлагаараа ерөнхий сайд Ч.Сайханбилэг засгийн газар УИХ-тайгаа ойлголцолд хүрч чаддаггүй байдлаа бүрэн дэлгэсний зэрэгцээ танхимын шийдвэрээ өөрийн зоргоор өөрчлөх бусангүй эрх мэдэлтэй гэдгээ харуулаад амжив.
Засаг унах тухай яриа чих дэлсэж, МАН-ын зургаан сайдын суудлыг бусад нам хүчнүүдэд хувааж эхэлсэн гэх бор шувуу нисэж буй. Яг энэ цагт Ч.Сайханбилэг танхимынхаа сайд нарын итгэлийг хүлээж чадах уу? гэсэн асуудал өөрөө эргэлзээ дагуулж байна.
Ж.Мядагбадам
