“С1” телевизийн “Шоубиз” нэвтрүүлэг хөтлөн анх олны өмнө гарсан жүжигчин Г.Анхбаяр сүүлдээ кино найруулагч болохоор нэлээд хэдэн бүтээлээ дэлгэцэнд гаргаад амжсан адтай нөхөр. Улмаар анхны киногоороо далимдуулан УИХ-ын хоёр ч удаагийн сонгуулиар чамлахааргүй мөнгө халаасалсан гэгдэх жүжигчин залуу маань хурим найр, томоохон арга хэмжээг хөтлөн ихэд туршлагажиж яваа.
Харин зарим үед олны танил эрхмүүд, найз нөхдөө хөөрхөн гэгч нь шоглоод авдаг жүжигчин Г.Анхбаяр “Crush bash” хамтлагийн залуусыг “Царайлаг охид” гэж хэлээд баахан хөглөсөн удаатай. Тэр ч байтугай нэгэн хөгжмийн наадмын тайзнаа “Сүүлийн үед манай Болд Монгол поп урсгалыг хөгжүүлнэ гээд байгаа. Гэтэл бас Сараа эгчийн “Аргагүй Монгол аялгуу” гээч юм гарч ирчихээд байна. Яг л нөгөө зах дээр “Монгол төмс” гээд биччихсэн зарж байхад, хажууханд нь “Жинхэнэ Монгол төмс” гээд зарсантай адилхан юм. Болдоо ч яахав, ганцаараа дуулах нь ашигтай гэдгийг мэдрээд байгаа хүн. Худлаа гэвэл Эба, Ганаа хоёроос асуух уу” хэмээн ярьж тэднийг баахан онигоонд оруулж байжээ.
Б.Содон
