Саяхан л ганц бие байсан найз минь гэр бүлийн гишүүнтэй болж гэнэ ээ. Эхнэр авсан юм байх гэж бодсон чинь үгүй бололтой юм. Сонгуулийн үеэр зарим нэг нэр дэвшигчид нь мань хүний гэр бүлийн гишүүн болох бололтой юмдаг уу даа. Орой очиход нь хоол ундыг нь хийгээд, гэр орныг нь цэвэрлээд өгөх юм байх. Цаашлаад юу эсийг хийх билээ. Тийм учраас сонгууль гэдэгт чинь олзуурхсан гэж жигтэйхэн, тэр найз минь. Яахав дээ, сонгуулийн хэдэн өдөр ч болов нэг гэр бүлийн гишүүнтэй байна гэдэг чинь. Харин зарим нэг эхнэртэй хүнд гэр бүлийн гишүүн нэгээр нэмэгдээд ирэхээр жаахан хэцүү байгаа бололтой. Зарим нэг нэр дэвшигчид айлд “Би ирлээ” гэж орчихоод, нөхөр нь ирэх гээд байхад явахгүй жаахан зовоогоод байгаа бололтой. Хөөрхийс цахим ертөнцөөр л нэг бичээд, тусламж ч гуйгаад байгаа юм уу, бүү мэд.
 
Нэгэн үе нэр дэвшигчид маань “Танд тэдэн төгрөг өгнө. Ингэж ч амьдралыг чинь өөд нь татна” гэж амладаг байсан бол одоо арай орчин үежиж байгаа юм уу даа. Нэг ёсондоо модернист болж байгаа ч байж болох. Угаасаа сүүлийн жилүүдэд реализмаас татгалзаад, бүх зүйлийг шинэчилж эхэлсэн хойно. Тиймдээ ч сонгуулийн үеэр сонгогчдынхоо гэрт очиж, гэр бүлийнх нь гишүүн болсон ч яахав гэсэн чин сэтгэлийн хандлагыг зарим нэг хүн зарчмаа болгож байх шиг. Тэр дундуур бас огт ойлгомжгүй сэтгэлгээтэй нөхдүүд ч бас байгаа юм. “Өмнөговио өөрсдөө л хөгжүүлцгээ, би бол зүгээр л та нарыг УИХ-д төлөөлнө” гэж ойлгож болохоор салаа утга бүхий тун ч өвөрмөц уриаг дэвшүүлсэн хүн байна.

Голоос хайртай амраг минь, шөнөдөө гэрэлтэм царайлаг даа” гэж нэг дуу бий дээ. Тэгвэл энэ дууг манай нэг улстөрч болох гэж байгаа эмэгтэйд зориулж зохиосон юм байна лээ. Аргагүй гэрэлтдэг учраас “Гэр орныг тань гэрэл гэгээтэй болгоно” хэмээн уриалсан байна

 
Эсвэл “Гоё зорилго, гоё сонголт гэх хэд хэдэн салаа утгыг илэрхийлсэн жинхэнэ модернист уриаг дэвшүүлсэн нэр дэвшигч ч байгаа юм. “Гоё” тарагны реклам ч юм уу. Яруу найргаар бол манай Б.Галсансүх ахын шүлэгтэй төстэй юм уу даа. Гоё зорилго нь ч өөрөө юм шиг. Гоё сонголт нь ч бас өөрөө. Ерөнхийдөө жаахан гоёхон дуу хүүхэн сонгочихвол зорилго чинь биеллээ ч гэж байгаа юм бил үү, хэн мэдлээ. Утга нь битүү, филисофи ханхалсан уриа үг болохоор нийтэд ижил ойлгогдох албагүй л дээ. Хүн бүр өөрийнхөөрөө ойлгож болно. Нэр дэвшигчид дунд уриа нь биш өөрөө изм ханхлуулсан нөхдүүд цөөнгүй байна.
 
Өнгөрсөн хугацаанд ажилласан манай улстөрчид үзэгний үзүүрээр, кнопоор бүх зүйлийг шийддэг байсан бол цаашид хогийн шүүр хэрэглэдэг болох бололтой юм. Томхон байх тусмаа сайн гэнэ ээ. Мань мэтийн сэтгэх нь ямар ч байсан төрийн ордон хоггүй л байх нь. Хүүе ээ, мартсанаас мал мэнд үү гэдэг шиг “Эгэл баатар” гэдэг цол гарчихаж ээ. Зарим нэг хүн энэ цолоор шагнуулаад, баатруудын эгнээг тэлж байгаа юм байна. Баатар цолтой хүмүүс өндөр албан тушаалд их сууж байгаа өнөө цагт барьцахгүй бол бас болохгүй л дээ. За энэ юу ч биш. “Голоос хайртай амраг минь, шөнөдөө гэрэлтэм царайлаг даа” гэж нэг дуу бий дээ. Тэгвэл энэ дууг манай нэг улстөрч болох гэж байгаа эмэгтэйд зориулж зохиосон юм байна лээ. Аргагүй гэрэлтдэг учраас “Гэр орныг тань гэрэл гэгээтэй болгоно” хэмээн уриалсан байна. Манай Улаанбаатар хотын захын гэр хороололд тог цахилгаангүй айлууд цөөнгүй байдаг юм билээ. Тэд нэг нэг өдөр гэртээ аваачвал ядаж л ганц хоног ч болов гэрэлтэй байх нь. Сонгууль болж байхад тэр зэргийн юмыг хийгээд өгчих байлгүй дээ.
 
Бас нэгэн өвөрмөц хүн хэрвээ намайг сонговол би юм ярихгүй, сонсоод л байна гэж амласан байна. Амлах ч юу байхав хөөрхий, үнэнээ хэлсэн нь тэр байлгүй дээ. Дөрвөн жил сонсч, тууштай суралцах нь түүний гол зорилго байх. Түүнийгээ ч зоригтой хэлж. Ийм зориг олон хүнээс гарахгүй шүү дээ. Жинхэнэ сонгодог. Сонгуулийн сурталчилгаа нэг иймэрхүү л гүн ухаанлаг, изм ханхлуулан эхэлж байна. Иргэдэд нэг л зүйлийг захимаар санагддаа. Энэ бол хошин шог биш, бодит зүйл. Зүгээр л өмнөх жилүүдийнхээс арай өөр урсгал чиглэлээр ажиллаж байгаа юм. Угаасаа гүн ухааныг нэг хэв загвараар ойлгох ямар ч боломжгүй. Тийм болохоор өөр өөрийнхөөрөө ойлгоод явчихна биз. Харин тэр гэр бүлийн гишүүн болох гээд байгаа нөхдүүдийг хэд хоног хэрэглэчихгүй юу яадаг юм.






 

Монголын мэдээ
Н.Пунцагболд