Энэ сарын 17-нд бүлэг этгээдүүд БНСУ-ын иргэнийг барьцаалж, амь насанд нь халдахыг завдсан хэрэг гарсан байна. Монгол Улсад хуулийн дагуу бизнес эрхэлж байсан БНСУ-ын иргэн К гэх эмэгтэй одоогоор эмнэлэгт хэвтэн эмчлүүлж байгаа гэнэ. Хохирогч эмэгтэй Солонгосын нэгэн группээс хөрөнгө оруулахаар Монгол Улсад иржээ. Тус группын хөрөнгө оруулсан компани Монголд алтны уурхайд олборлолт хийдэг нэгэн бөгөөд 2013 оноос хойш манай улсад амьдарч байгаа аж. Энэ хэрэгт Т.Таня гэх эмэгтэйг цагдаагийн байгууллага шалгаж байгаа гэнэ. Сэжигтэн Т.Таня нь хохирогч К-г барьцаалуулахаар 15-16 залууг хөлсөлсөн гэнэ.

Хэргийг тодруулбал, хохирогч К-гийн хэлж буйгаар Т.Таня гэх эмэгтэйг тус группын өмнөх захиралаар ажиллаж байсан солонгос хүн гүйцэтгэх захирлаар томилсон юм байна. Тэрбээр уг албан тушаалд байхдаа албан тушаалаа урвуулан ашиглаж, их хэмжээний алт тушаагаагүйн улмаас Зохион байгуулалттай гэмт хэрэгтэй тэмцэх газрын Эдийн засгийн гэмт хэрэгтэй тэмцэх хэлтэст шалгуулж байсан тул албан тушаалаас нь чөлөөлсөн байна. Гэтэл “Би энэ компанийн захирал” хэмээн бичиг баримт, тамга тэмдэг булаах оролдлого хийсэн бөгөөд тэр ч бүү хэл компаниа шилжүүлэх гарын үсэг зур гэж хүч хэрэглэж өөрийг нь барьцаалсан гэнэ. Өмнө сэжигтэн Т.Таня нь хохирогч эмэгтэйг “ална” хэмээн сүрдүүлж нүүр лүү цохиж гэмтээж байжээ.

Сэжигтнээр татагдсан Т.Таня гэх эмэгтэйг Эрүүгийн хуулийн 150 дугаар зүйлийн 150.3-т зааснаар эрүүгийн хэрэг үүсгэн шалгаж буй юм байна.

Эх сурвалж: Шуурхай.мн