Хянан магадлангийн шүүх хурлаар хуулийн дагуу хугацаанаас өмнө тэнсэн суллагдсан хүмүүжигчид шүүхэд баярласнаа илэрхийлж байна. Хорих ялаа он удаан жил эдлэсэн тэд зохих шаардлагыг хангасны дагуу магадлангаар орох гэж нойр хоолоо умартан хоног тоолдог биз ээ. Тиймдээ ч эрх чөлөө гэдгийн үнэ цэнийг мэдэрснээ ярьж байна. Монголын шүүх ялын тогтоол уншсан шигээ бас засарч хүмүүжсэнийг тэнсэн сулладагийг энэхүү үйл явдлаас харж болно. Нэгэн цагт Азийн цагаан дагина гэж гадна дотныхонд гайхуулж байсан Улаанбаатар хот өдгөө эмх замбараагүй шоргоолжны үүр шиг болсон. Азийн цагаан дагиныг адгийн муухай болгосон буруутан нь мэдээж үе үеийн хотын удирдлагууд, мөн дур зоргоор авирлагч, хуулийг уландаа гишгэгчид. Дуртай нэг нь малын хороо шиг хашаа хатгаж, хогийн сав шиг чингэлэг авчирч тавьж, хотын өнгө үзэмжийг тунчиг доошоо татаж буй. Үүний эсрэг Үүл баатар чадлаараа тэмцэж, захирамж тушаал гарган захаас аван нурааж, хурааж хотын өнгө зүсийг сайжруулахын төлөө зүтгэж байгаа. Хотын даргын энэхүү “тэмцэл”-ийн үр дүнд хот бага ч гэсэн өнгө нэмж байгааг үгүйсгэмгүй.
Харин Үүл даргын чөдөр тушаа нь хаа бол биш хажуу бөөрөндөө байна. Баянгол дүүрэгт АН-ын ҮЗХ-гийн гишүүний нэр сүрээр далайлгасан нөхөр Үүл баатрын захирамж тушаалыг сөрж, ажлыг нурааж байгааг олон түмэн шуугиж байна. Баянгол дүүргийн 3 дугаар хороо буюу хуучнаар Тээврийн товчооны баруун талд байрлах “Ангара” зочид буудлын эзэн Д.Мөнхжаргалын хууль бус үйлдэл оршин суугчдын амгалан тайван байдлыг алдагдуулаад хэдэн жилийн нүүр үзлээ. “Ангара” зочид буудлын эзэн Д.Мөнхжаргал нь нийтийн эзэмшлийн зам талбайг дур мэдэн хашин иргэдийг бухимдуулсаар. Аргаа барсан оршин суугчид төр захиргааны байгууллагад ханддаг ч дээшээ тэнгэр хол доошоо газар хатуу гэгч болжээ. Хууль бусаар нийтийн эзэмшлийн талбайг тойруулан татсан ногоон төмрөн хашааг буулгахыг Баянгол дүүргийн өмч газрын харилцааны алба удаа дараа шаардсан ч одоог болтол нийтийн эзэмшлийн талбайг чөлөөлж өгөхгүй арга саам хайсаар байна. “Ангара” зочид буудлын эргэн тойронд баахан контейнер овоолж тавьчихаад хог новш цуглуулан оршин суугчдын эрүүл аюулгүй орчинд амьдрах эрхэнд заналхийлсээр.
Орчин тойрноо хог новшинд умбуулсан тус зочид буудлын эзэд Улаанбаатар хотоо утаатай, хогтой гэж голон Канадад амьдардаг гэх. “Ангара” зочид буудлын эздийн оршин суугчдыг бухимдуулан татсан ногоон хашаагаа буулгахыг шаардсан Дүүргийн Засаг дарга Д.Оросоогийн захирамж энэ байна. Нийслэлийн өмчийн харилцааны шаардах хуудас ч бас энд байна. Уг нь хууль зөрчсөн хэнбугай ч зохих ёсны шийтгэлээ хүлээх учиртай. Төр төмөр нүүртэй. Хууль зөрчиж зөвшөөрөлгүй хашаа хатгасаныг буулгаж иргэдийн эрүүл аюулгүй амьдрах орчинг бүрдүүлэх үүрэг хүлээсэн Нийслэлийн Өмчийн харилцааны албаны газар чөлөөлөх хэлтэс уг нь энэхүү ногоон төмрөн хашааг дор нь буулгаад хаях ёстой. Гэтэл ёс төдий бичиг цаас шидсэн болчихоод хэн нэгнээс айгаад суугаад байгааг хотын даргын сонорт хүргэе. Энэ зочид буудал нь АН-ын ҮЗХ-гийн гишүүн Гэрэлийн эзэмшлийнх гэж хүмүүс ярьдаг. Хотыг АН-ын баг бүрэлдэхүүн удирдаж өнгө зүсийг сайжруулахаар толгой өөд татахгүй ажиллаж байхад ар хударгаар нь АН-ын нэрийг барьсан нөхөд ийн иргэдийг бухимдуулж, намын нэр хүндийг шалан дээр унагаж байгааг хэлэхгүй өнгөрч болохгүй байна.
Б.ҮНЭНБАТ
