ШӨХТГ-аас өнөөдөр “Хаан даатгал” ХХК-ийн зөрчлийг олон нийтэд танилцууллаа. Тодруулбал, тус компани Орон сууц, нийтийн аж ахуйн удирдах газартай энэ оны нэгдүгээр сарын 26-ны өдрийн № ХА15018/06 дугаартай хамтран ажиллах гэрээ байгуулан түүний харьяа 16 хэрэглэгчдэд үйлчлэх төвөөр дамжуулан орон сууцны иж бүрэн даатгалын хураамж болох 1500 төгрөгийг хэрэглэгчийн зөвшөөрөлгүй, бичгээр байгуулсан гэрээгүйгээр “бүлгээр хийгдэх даатгал” нэрийдлээр оршин суугчдын байрны төлбөрт шууд тооцон авч байсан зөрчил илэрсэн байна.
Түүнчлэн Санхүүгийн зохицуулах хорооны 2008 оны 61 дүгээр тогтоолыг зөрчин хөрөнгийн болон хариуцлагын даатгалын хэлбэрээр тусгай зөвшөөрөл авч, зөвхөн орон сууцны хөрөнгийн даатгалын бүтээгдэхүүнийг зах зээлд борлуулахаар Санхүүгийн зохицуулах хороонд бүртгүүлсэн байна. Үүгээр зогсохгүй “Хаан даатгал” ХХК нь үйл ажиллагаанд даатгуулагчийн шилжилт хөдөлгөөн нэг бүрийг хийдэггүй, даатгалын хураамжийг давхардуулан авдаг, гэрээний сунгалт болон дүгнэх, цуцлах, өөрчлөлт оруулах нөхцөлүүдийг хуульд заасан шаардлагын дагуу гэрээнд тусгадаггүй зэрэг зөрчилтэй байжээ.
“Хаан даатгал” ХХК-ийн энэхүү үйлдэл нь бүхэлдээ Хэрэглэгчийн эрхийг хамгаалах тухай хуулийн 5.1, 6.2, Өрсөлдөөний тухай хуулийн 12 дугаар зүйлийн 12.1.10, Иргэний хуулийн 189 дүгээр зүйлийн 189.1, 196 дугаар зүйлийн 196.1.2, 431 дүгээр зүйлийн 431.3, Даатгалын тухай хуулийн 6 дугаар зүйлийн 6.1, 6.2, 6.4, Санхүүгийн зохицуулах хорооны холбогдох журмуудыг тус тус зөрчсөн байна. “Хаан даатгал” ХХК нь 2013-2015 оны байдлаар 55411 өрхийг даатгалтай гэх байдлаар даатгалын төлбөрийг хэрэглэгчдээс авч байсан бол үүнээс бичгээр хийгдэж, баталгаажсан гэрээт өрхийг шалгахад 2013 онд 9354, 2014 онд 44833, 2015 онд 10557 өрх байна .
Өөрөөр хэлбэл, “Хаан даатгал” ХХК нь 2013 оны байдлаар 46057, 2014 оны байдлаар 10578, 2015 оны байдлаар 44854 өрхтэй бичгээр гэрээ байгуулж, баталгаажуулаагүй бөгөөд энэхүү үйл ажиллагааны улмаас 2013 онд 552.6 сая, 2014 онд 190.4 сая, 2015 оны байдлаар 269.1 сая төгрөг, нийт 1 тэрбум 12.1 сая төгрөгийн хууль бус орлого олж, иргэдэд хохирол учруулсан байна. Иймд ШӨХТГ-аас дээрх байгууллагын хамтран ажиллах гэрээг цуцалж, хэрэглэгчдэд учруулсан хохирлыг барагдуулах хүсэлтийг Нийслэлийн Засаг дарга Э.Бат-Үүлд хүргүүлжээ.
ЭХ СУРВАЛЖ : TIMES.MN
