Өмнөговь аймгийн Иргэдийн Төлөөлөгчдийн Хурал(ИТХ)-ын дарга асан Б.Бадраа нь гадаадын компаниудад газар эзэмшүүлсэн гэх хэрэгт яллагдагчаар татагдсан.

Тодруулбал түүнийг Нийслэлийн прокурорын газраас

• Эрүүгийн хуулийн тусгай ангийн 22.1 дүгээр зүйлийн 2 дахь хэсэг /Эрх мэдэл, албан тушаалын байдлаа урвуулан ашиглах/,
• мөн хуулийн 18.6 дугаар зүйлийн 2 дахь хэсгийн 2.2-т /Мөнгө угаах/ заасан гэмт хэрэгт холбогдуулан яллагдагчаар татсан юм.

Б.Бадраад өмнө нь хувийн баталгаа гаргах таслан сэргийлэх арга хэмжээ аваад байсан бөгөөд үүнийг нь өөрчлөн цагдан хорих таслан сэргийлэх арга хэмжээ авхуулах тухай саналыг Сүхбаатар дүүргийн Эрүүгийн хэргийн анхан шатны шүүхэд прокурорын байгууллагаас хүргүүлжээ.

Тус шүүх прокурорын саналыг 2023 оны арванхоёрдугаар сарын 25-ны өдөр хянан хэлэлцэж, яллагдагч Б.Бадраад урьд авсан хувийн баталгаа гаргах таслан сэргийлэх арга хэмжээг өөрчлөн Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.1, 1.3-д заасан үндэслэлээр Монгол Улсын хилээр орж ирсэн даруйд цагдан хорих таслан сэргийлэх арга хэмжээ авч шийдвэрлэлээ гэж Баянзүрх, Сүхбаатар, Чингэлтэй дүүргийн Эрүүгийн хэргийн Анхан шатны шүүхийн Тамгын газраас мэдээллээ.