УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх шийдвэрийг өчигдөр Халдашгүй байдлын дэд хороо гаргаж, улмаар УИХ дахь МАН-ын бүлэг дэмжсэн. Байнгын хороод хаалттай хуралдаж дэмжсэн ба өнөөдрийн УИХ-ын чуулганаар хэлэлцэнэ.
УИХ-ын гишүүнээс чөлөөлсөн Ж.Мөнхбатыг оролцуулаад, 72 гишүүнтэй болж байна. Нөхөн сонгуулийн талаар ч СЕХ шийдвэрээ гаргах цаг болж байна.
УИХ-ын гишүүдийн тоо цаашдаа ч буурна гэж эх сурвалж мэдээллээ. Өөрөөр хэлбэл, УИХ-ын гишүүн А.Адъяасүрэн, Ё.Баатарбилэг нарын таван УИХ-ын гишүүний бүрэн эрхийг түдгэлзүүлэх саналыг Улсын ерөнхий прокуророос оруулж ирж магадгүй байна.
УИХ-ын гишүүн А.Адъяасүрэнгийн хувьд БНХАУ-ын хөрөнгө оруулалттай “Тэнгри транс”, “Сан тээвэр”, “Ульгансар транс” компанийнхаа хүнд даацын 680 ачааны автомашинд улс хоорондын ачаа тээврийн С зөвшөөрөл олгуулахын тулд Автотээврийн үндэсний төвийн Тээвэр зохицуулалтын хэлтсийн дарга Г.Доржпаламд хүргэн Б.Габит гэх хүнээрээ дамжуулан 2020 оны гуравдугаар сарын 31-нд Чингэлтэй дүүргийн нутаг, “Peace tower”-ын 804 тоот өрөөнд 100 000 ам.доллар өгсөн хэрэгт холбогдуулан түүнд АТГ-ын Мөрдөн шалгах хэлтсийнхэн эрүүгийн хэрэг үүсгэсэн билээ.
Харин, УИХ-ын гишүүн Ё.Баатарбилэгийн хувьд Эрүүгийн хуулийн 22.4-6 дахь хэсгийн “Улс төрд нөлөө бүхий нийтийн албан тушаалтан хахууль өгөгчийн ашиг сонирхлын үүднээс гүйцэтгэх ёсгүй үйлдлийг хийхийн тулд бусдаар дамжуулан хахууль авсан”, 22.10-2-т заасан “Улс төрд нөлөө бүхий нийтийн албан тушаалтан өөрийн хөрөнгө, орлого их хэмжээгээр нэмэгдсэн нь хууль ёсны болохыг үндэслэлтэй тайлбарлаж чадаагүй” гэсэн үндэслэлээр яллагдагчаар татаад байгаа юм.
Цаашилбал, УИХ-ын гишүүн Х.Ганхуяг, Г.Амартүвшин, Б.Энх-Амгалан нарын бүрэн эрхийг түдгэлзүүлэх санал ч орж ирж магадгүй. УИХ-ын гишүүн Х.Ганхуягийг Эрүүгийн хуулийн 22.1-2-т заасан албан тушаалаа урвуулан ашигласан хэмээн яллагдагчаар татсан бөгөөд шүүх хилээр гарахыг нь хязгаарлах захирамж гаргасан. УИХ-ын гишүүн Г.Амартүвшинг мөн хилээр гарахыг хязгаарлах прокурорын саналыг Сүхбаатар дүүргийн Эрүүгийн хэргийн анхан шатны шүүх хэлэлцээд энэ дагуу шийдвэрлээд байгаа юм.
УИХ-ын гишүүн Б.Энх-Амгаланг сайд байхдаа Ерөнхийлөгчийн Тамгын газрын дарга зэрэг улс төрд нөлөө бүхий албан тушаал хашиж байсан З.Энхболдтой хамаатай гэгддэг “Страто” ХХК-д давуу байдал бий болгосон хэмээн буруутгаад байгаа.
