Баянзүрх дүүргийн 11 дүгээр хорооны нутаг дэвсгэрт хуучин акумлятор задалж боловсруулдаг “Заламт гол” компанийнхан байгаль орчин, хүн, мал хордуулсаар байгаа ажээ. Энэ тухай өнгөрсөн намар манай сайт мэдээлж байлаа. Тэгвэл энэ асуудлаар өчигдөр тус хорооны иргэдийн нийтийн хурал болов. Хуралд байгаль орчны чиглэлээр ажилладаг зарим төрийн бус байгууллагынхан болон “Заламт гол” компанийн удирдлагууд оролцлоо. Хурал нэлээд ширүүн маргаан, мэтгэлцээн дунд өрнөв. Иргэдийн хувьд тун гомдолтой байгаа аж. Мал нь үхдэг, хүмүүсийн биеэр юм туурдаг, хүүхэд хөгшид хорддог болжээ. Тэд энэ бүхнийг хуучин аккумляторын батарейны хар тугалга, бусад шингэн бодисын нөлөөнөөс хэмээн тайлбарлаж, зарим нь “Заламт гол” компанийн захирал Ц.Ууганбаярт “Чи компаниа ус булаг, гол горхины аман дээр байгуулснаас болоод бид хордож байна. Танай компанийг эндээс бид заавал нүүлгэнэ. Дээгүүр, дарга нартай хуйвалдаад та нар зөв зүгээр явж таарахгүй. Мэргэжлийн хяналтынхан нь хуурамч дүгнэлт гаргадаг” гэж байлаа. “Гамшгийн эсрэг үндэсний төв”-ийн тэргүүн Ж.Ганбаатар “Энэ компанийн үйл ажиллагаа, хяналтын байгууллагын дүгнэлт зэрэгт эрх зүйн зөрчилтэй зүйл их бий. Байгаль орчины бохирдолд дүгнэлт гаргуулахаар дээжийг нь аваад хоёр өөр лабораторид шинжлүүлэхэд хоёр өөр дүгнэлт гардаг. Мэргэжлийн хяналтын өөрсдийнх нь лабораторийн дүгнэлтээр хордолтгүй зүгээр гэж гараад, геологийн лаборатийнх болохоор хордолттой гэсэн дүгнэлт гарч байгаагийн учрыг олох хэрэгтэй. Яагаад зөрүүтэй дүгнэлт гаргаад байна. Ер нь энэ компанийг 11 дүгээр хорооны нутгаас нүүлгэх нь зөв” гэсэн юм.
Өнгөрсөн намар энд хүүхдүүд хар тулалганд хордсон байж болзошгүй гэсэн эмчийн дүгнэлт гарч байжээ. Хордсон хоёр гурван хүүхдийн биеийн байдал одоо ч бүрэн сайжраагүй гэж иргэд гомдоллож байлаа.
Баянзүрх дүүргийн 11 хороо буюу Хонхор өртөө, Хөлийн голын ай сав орчимд намаг, шавар ихтэй. Эндэхийн айлуудаас 7-8 км зайд “Заламт гол” компани үйлдвэрээ барьжээ. Тус компани 660 метр квадрат талбайд акумлятор хүлээн авах, тугалгыг ялгах, цэвэрлэх, хайлуулах, хэвэнд цутгах ажиллагаа явуулдаг юм байна. Газрын гүн рүү 150 метр ухаж цемент зэргээр бэхжүүлсэн тусгай саванд хүхрийн хүчил зэргийг хадгалдаг аж. Эндээс хүн хордох боломжгүй гэсэн тайлбар тавьж буй ч иргэд хэрхэн хордож байгаагаа тус компанийн захирал Ц.Ууганбаярт бухимдалтай нь аргагүй хэлж байв. Ц.Ууганбаяр захирал харин “Би компаниа яагаад ч нүүлгэж чадахгүй. Барьж босгох гэж маш их хөрөнгө зарцуулсан. Би яаж энэ алдагдлаа нөхөх юм бэ” хэмээн сүүлд нь учирлаж үзэв. Гэвч иргэдийн хурлынхан түүний энэ үгийг хүлээж авсангүй.
Ийнхүү удтал хуралдсан иргэдийн нийтийн хурлаас “Заламт гол” компанийг нүүлгэн шилжүүлэх шийдвэр гаргалаа. Хурал даргалагчийн зүгээс эцэст нь “Бидний энэ шийдвэрийг дээд байгууллагууд хүлээн авч шударгаар шийдэх байх гэж найдаж байна. Хэрвээ эс зөвшөөрч, “Заламт гол”-ыг энд хэвээр үлдээхэд хүрвэл иргэд бид тэмцэлээ үргэлжлүүлэх болно” гэсэн юм.
Б.Отгонбаяр
Эх сурвалж: Tumen.mn
