Ингэж болдог юм уу, Б.Отгон сэтгүүлч ээ! Мэргэжлийн ёс зүйн үүднээс сэтгүүлч Б.Отгон Танд гүн эмгэнэл илэрхийлье!
Монгол Улсын Гавьяат хуульч асан, Монголын хуульчдын гүнээ хүндэтгэдэг эрхэм хүн Бираагийн Чимэд агсаны овгийг буруу бичиж байгаад түүний хүргэн байсных нь төлөө “Рио Тинто” компанийн Зэсийн группийн захирал Б.Болдыг “4 тэрбумын цалингийнхаа оронд эх орноосоо урвачихлаа гэж үү” хэмээн шившиглэх гэж арга ядаж байгаа харагдана. “Эх орноосоо урвах” гэдэг үгээр тоглож болдоггүй юм. Энэ бол Эрүүгийн хуулийн 19 дүгээр бүлэг Үндэсний аюулгүй байдлын эсрэг гэмт хэрэг буюу 19.1-д зааснаар “Эх орноосоо урвах гэмт хэрэг гэдэгт ямар хэргийг хамааруулдгийг туршлагатай сэтгүүлчийн хувд Та мэдэх байх.
Б.Болд бол Оюутолгой төслийн асуудлаар “Рио Тинто” компанийг төлөөлж Монголын Засгийн газрын багтай хэлэлцээр хийж байгаа болохоос “дайсны тал” биш. Ингэж олон нийтийг мунхруулж мушгин гуйвуулж мэдээлэх нь зарчмын хувьд байж боломгүй үйлдэл. Бодит байдлыг ингэж мунхагаар зарласнаараа Та “Эх оронч”, бусад нь “Эх орноосоо урвагч” болчихгүй.
Дараагийн асуудал нь Монголын иргэншил авсан иран гаралтай бөх Саиед Моллай “Токио 2020” олимпын наадамд Монголын баг тамирчид дунд Монгол Улсын нэрийн өмнөөс барилдаж олимпын мөнгөн медаль хүртсэн. Түүнд их аварга Асашёорюү Д.Дагвадорж “гурван өрөө байр бэлэглэсэн” юм даг уу даа. Д.Дагвадорж аварга Чөлөөт бөхийн холбоог удирдаж байгаад 2016 оны 8 дугаар сарын 22-нд үүрэгт ажлаа хүлээлгэн өгсөн. Сэтгүүлч Б.Отгонтой харьцуулах гэвэл Монголоо гэсэн “цөс нь хөөрч цус нь буцалсан”, хийсэн ажилтай, байгуулсан гавьяатай эх оронч залуу. Гэтэл яагаад “хотын дарга ах”-ыг нь дурдаж, Үндэсний хөрөнгө оруулалтын банкны нөхцөл байдал, эрүүл мэндийн сан, нийгмийн даатгалын сангийн “олон тэрбум” гэгчийг төлөх болчихов?
Сэтгүүлчийн хувьд олон тэрбум гэдэг тоо байж болох уу? Үүгээр банкны байгууллагын болон албан тушаалтан, хувь иргэдийн нэр хүндтэй баримтгүйгээр холбон гүтгэж нийгэмд тараах нь тодорхой зүйл анги бүхий гэмт үйлдэл бус уу?
Эргэн сануулахад 2020 оны 11 дүгээр сарын 26-ны өдөр сэтгүүлч Г.Отгон нь АПУ ХК-ийн гүйцэтгэх захирал Ц.Эрдэнэбилэгийн “Цэвэр спирт үйлдвэрлэх түүхий. Эдийн нөөцгүй болсон, архины үйлдвэрлэл зогсож байгаа, цаашид 7 хоног л тэснэ- гэсэн мэдээллийг түгээхдээ “Архины үйлдвэр хаагдвал баярлах хүн олон доо” хэмээн бичихэд түүнийг уншсан олон хүн гайхаж халаглаж жигшиж байсан. “Эрүүл, чанарын баталгаатай бүтээгдэхүүн үйлдвэрлэж чадахгүй нь” гэхэд “Чанарын баталгаагүй архи худалдаалах нь нэмэгдэх вий” гэж харамсахын оронд Монголдоо тэргүүлэгч татвар төлөгч компанийг хаагдвал баярлана” гэсэнд гайхахгүй яах билээ?
Энэ мэтээр сэтгүүлч Б.Отгон өнгөрсөн хугацаанд мэргэжлийн ёс зүйгээ зөрчсөн, муйхарлан доромжилж улайран дайрсан, монголчуудыг талцуулцаж зөрчилдүүлсэн мэдээллээр “тархийг нь угаасаар” удаж байна. Сошиал хуудас үзэл бодлоо илэрхийлэх эрхээ эдэлж, олон хүнд уншигддаг нь түүний давуу тал мөн бол үүнийгээ зөв зүйлд ашиглах, үнэн бодит мэдээлэл хүлээх үүргээ сэтгүүлч Б.Отгон хүлээх л ёстой.
Сэтгүүлч гэдэг нэр хүндтэй, нандин мэргэжил фэйсбүүк хуудаснаа дүрэмгүй тоглох эрх олгодог юм биш. Үзэл бодлоо цензургүй илэрхийлэхдээ мэргэжлийн давуу талаа урвуугаар ашиглахыг хатуу хориглоно гэдгийг Эрхэм сэтгүүлч Б.Отгон Танд сануулах нь зүй ёсны шаардлага юм. Учир нь Монголын олон сэтгүүлч Б.Отгон Таны өмнөөс Монголын ард түмнээс ичиж байна.
