Халамжийг нэг ч нүдээрээ үздэггүй эрх баригчид ард түмнээ “халамжилж” эхэллээ. Энэ нь өчигдөр Төрийн ордонд хийсэн “Шийдлийн” Засгийн газрын тэргүүн Ч.Сайханбилэгийн мэдэгдлээс харагдана.
Тэрбээр Монгол Ардын Намын засаглалын үед иргэдэд тараасан 1072 ширхэг хувьцааг гэнэт “амь оруулж” талыг нь бэлэн мөнгөөр худалдаж авах тухай мэдээлэл хийсэн юм.
Тэрбээр Монгол Ардын Намын засаглалын үед иргэдэд тараасан 1072 ширхэг хувьцааг гэнэт “амь оруулж” талыг нь бэлэн мөнгөөр худалдаж авах тухай мэдээлэл хийсэн юм. Ингэхдээ 1072 ширхэг хувьцааны 300 мянган төгрөгтэй дүйцэх дүнг нь төр худалдан авч 700 мянган төгрөгтэй тэнцэх хувьцааг иргэнд үлдээнэ гэнэ.
Нөгөө талд УИХ дахь Монгол Ардын Намын бүлгийн гишүүд 1072 ширхэг хувьцааг бэлнээр мөнгөжүүлж иргэн бүрт өгөх УИХ-ын тогтоолын төсөл санаачилснаа мөн дуулгасан. Аль аль нь сонгууль эхлэхтэй холбогдуулж хийж байгаа нь ойлгомжтой. Өнөөдөр халаас нь дэндүү нимгэрсэн иргэдэд 300 мянган төгрөг нь ашигтай юу, нэг сая төгрөг нь хэрэгтэй юу гэдгийг бодох л ёстой асуудал. 2012 онд Монгол Ардын Нам засаглаж байхдаа иргэдийн 1072 ширхэг хувьцааг нэг сая төгрөгөөр худалдаж аваад эхэлчихсэн байсан юм.
Хэрэв Монгол Ардын Нам тухайн жилийн сонгуульд олонхи болсон бол үргэлжлүүлэн хувьцааг нь бэлэн мөнгө болгох байснаа өнөөдөр ч ярьж буй. Гэтэл сүүлийн дөрвөн жил эрх баригчдын хараанд огт өртөөгүй, харахыг ч хүсээгүй 1072 ширхэг гэнэт үнэд орох нь юуг зөгнөнө вэ. Сонгууль дөхөөд ирэхээр АН-ын шоу тоглолт идэвхжиж, чамин хээнцэр зүйлсээр тайзаа чимэглээд, ард түмний хулхин дээр цэцэг ургуулаад сурчихсан улс л даа. Тодруулбал, хэн нэгний эхлүүлсэн ажлыг өөрийн болгож, хэн нэгэнд авторлагдсан үйлсийг “минийх” болгохдоо дэндүү гаргуун хүмүүс юм.
АН-ын дарга нь ард түмнээ халамжлахгүй гэж мэдэгдээд байхад Ерөнхий сайд нь “халамжилна” гээд гүйгээд байгаа нь тун чиг ойлгомжгүй. Ард түмний халаас хэнээс болж нимгэрсэн бэ? Кг-ын эдийн засгаас граммын эдийн засаг руу хэн уруудуулсан бэ? Талхаа хувааж авдаг болсон амьдралыг хэн “бэлэглэсэн” бэ? Эдгээр асуултын хариуг холоос хайх хэрэггүй. Дэлхийн эдийн засаг ч ярих шаардлагагүй. Сүүлийн дөрвөн жил эрх барьсан АН-ын “ганган” бодлого, “чамин” үгийн гай.
Анхнаасаа л Монгол Улсын эдийн засгийг хямрааж, иргэдийнх нь халаасыг хоосолж байгаад сонгууль дөхөөд ирэхээр хэдэн төгрөг өгөөд саналыг нь худалдаад авчихна гэж бодсон байх л даа, АН-ынхан… Харамсалтай нь Монгол Ардын Намынхан 1072 ширхэг хувьцааг нэг сая төгрөгөөр худалдаж авах санаачилга гаргачихлаа. Тэдэнд Монгол Улсын иргэн бүрт 1072 ширхэг хувьцаа тараасан, буцаагаад нэг сая төгрөгөөр иргэдээсээ авч байсан туршлага бий.
Энэ өнцөгөөс нь харвал Монгол Ардын Намын зөв. Нөгөө өнцөгөөс нь харвал АН-ын буруу. Ядарсан ард түмнийхээ саналыг нэг сая төгрөг давуулаад үнэлчихэж чадахгүй, аргагүй л АНдуурсан тоглолт байлаа, эрх баригчдаа. Харин хаа очиж Монгол Ардын Намынхан чинь ядарсан ард түмнээ МАНдуулчихаж байгаа юм биш үү. 300 мянган төгрөг, нэг сая төгрөгийн хооронд маш хол зөрүү бий гэдгийг АН-ынхан даан ч ухаарсангүй дээ.
С.НЭМЭХ
Шуурхай.мн
