Баруун Африкт олон мянган хүнийг үхүүлсэн аймшигт өвчин Эболаг эмчлэх эмийг олохоор эрдэмтэд шургуу хөдөлмөрлөж байна. АНУ-ын Эболагийн эм бүтээх багийнхны мэдээлснээр тэдний бүтээсэн эм уг өвчний вирус халдварласан сармагчингуудыг эмчилж чадсан байна.
Эмийг турших эмчилгээ 28 өдөр үргэлжилсэн бөгөөд туршилтад оруулсан гурван сармагчин гурвуулаа эрүүл болсон гэлээ. Харин вирусээр тариулсан боловч эмчилгээ хийгээгүй гурван сармагчин бүгд ес хоногийн дараа үхсэн байна.
Гэвч эрдэмтэд эм хүнд үйлчлэх эсэхийг баталж амжаагүй байгаа гэдгийг анхааруулжээ. Харин эмийг хүнд турших туршилтыг энэ жилийн хоёрдугаар хагасаас эхлүүлэхээр төлөвлөөд байгаа аж.
Одоогоор Эболагийн халдвар буурсан боловч халдварласан хүнийг үр дүнтэй эмчилдэг эм дэлхийн хаана ч зохион бүтээгдээгүй байна. Хөгжингүй улс орнууд эм бүтээх туршилт явуулж байгаа ч нэг ч эм хүнийг эмчилдэг хэмээн батлагдаагүй байгаа юм.
2014 оны гуравдугаар сард уг өвчин дэгдсэнээс хойш Либери, Гвиней, Сьерра-Леон, Нигери, АНУ, Малид тархаж нийт 10602 хүн амиа алдсан билээ. Эболагийн халдвар нь дэлхийн хамгийн хөнөөлт өвчнүүдийн нэгд тооцогдох болжээ.
Д.Идэр
Эх сурвалж: 24tsag.mn
