НИТХ-ын 2020 оны сонгуульд Монгол Ардын Намаас нэр дэвшигчдийн сурталчилгаа эхэллээ. Арга хэмжээг нээж Нийслэлийн Монгол Ардын Намын хорооны дарга, УИХ-ын гишүүн Д.Сумъяабазар үг хэлсэн юм.
Тэрбээр УИХ-ын ээлжит сонгуульд Монгол Ардын Намд итгэл хүлээлгэн, багаар нь дэмжиж хүчээ нэгтгэсэнд талархлаа илэрхийлээд “...хөгжлийн бодлогыг талцаж хуваагдсан бус тогтвортой, нэгэн зүгт харж чадсан төр засаг манлайлж чаддаг гэдгийг иргэд маань өнгөрсөн хугацаанд ойлгожээ. УИХ, ЗГ, орон нутгийн удирдлагууд, иргэд хүчээ нэгтгэж байж улсаараа хөгжинө.
Чухамхүү энэ бодлогыг нийслэл, дүүрэгт төлөөлж чадах шигшигдсэн залуусаа бид та бүхний мэргэн сонголтод илгээж байна. УИХ, ЗГ-аас гарч буй бодлого, шийдвэр иргэдийн амьдралд бодитоор хүрэх эсэх нь орон нутагт төрийн бодлогыг гардан хэрэгжүүлэх хүнээс шууд хамаардаг. Тиймээс Монгол Ардын Намд хариуцлагыг бүрэн хүлээлгэж, хотын хөгжилд хүчээ нэгтгэхийг уриалж байна” хэмээсэн юм.
Монгол Ардын Нам нийслэлийн асуудлыг ирэх дөрвөн жилд шийдвэрлүүлэхээр эх орноо гэсэн сэтгэлтэй, ёс зүйтэй, мэдлэг боловсролтой, туршлагатай байх зарчимд нийцсэн 45 хүнийг нэр дэвшүүлж буй. Эдгээр нэр дэвшигчдээс эрх зүйч 10, улс төр судлаач 12, багш дөрөв, инженер тав, эдийн засагч тав, эмч нэг, нисгэгч нэг, программист хоёр, бизнесийн удирдлагын чиглэлээр мэргэжил эзэмшсэн тав, хөгжлийн судлаач таван хүн байна. Харин эмэгтэй нэр дэвшигч ес, анх удаа нэр дэвшиж байгаа 33 хүн байгаа юм.
Өнгөрсөн дөрвөн жилийн хугацаанд Монгол Ардын Нам нийслэлийн хэмжээнд 156 км авто зам, 2100 метр урт гүүр шинээр ашиглалтад оруулж, 134 км авто зам, 516 метр урт гүүр өргөтгөн шинэчлэх ажлыг хийгээд байна. Түүнчлэн 25.6 км дугуйн зам ашиглалтад оруулсан бол 2020 онд 50.24 км дугуйн зам барихаар төлөвлөж буй юм. Мөн энэ хугацаанд,
Ногоон байгууламж 2-3 дахин нэмэгдсэн;
8.8 тэрбум төгрөгийн тоног төхөөрөмж, 48 тусгай зориулалтын авто машинаар парк шинэчилсэн;
42 сургууль, 92 цэцэрлэг, 12 бага сургууль шинээр ашиглалтад оруулсан;
Гурван ээлжээр хичээллэдэг байсан ЕБС-иудыг хоёр ээлжээр хичээллэдэг болгосон ;
Улаанбаатар хотын агаарын бохирдлыг 50 хувь бууруулсан;
Гэр хорооллын гэрэлтүүлгийг 70 хувьд хүргэсэн;
1744 айлын түрээсийн орон сууцанд иргэдийг хамруулсан зэрэг томоохон бүтээн байгуулалтуудыг хийсэн.
Харин ирэх дөрвөн жилд “Орлогод нийцсэн орон сууцны төсөл”-ийг хэрэгжүүлж, 23000 мянган айлыг орон сууцтай болгох, Сэлбэ, Баянхошуу, Дамбадаржаа, Дэнжийн мянга, Шар хад, Толгойт зургаан дэд төвийг гурван үе шаттай хэрэгжүүлэх, нийтийн тээврийн салбарт иж бүрэн парк шинэчлэх зэрэг томоохон ажлуудыг хийхээр төлөвлөж буй юм. Энэ удаагийн сонгуульд Монгол Ардын Нам 13 зорилт бүхий 186 үндсэн үйл ажиллагааг хийж хэрэгжүүлэхээр нийслэл хотын хөгжлийн хөтөлбөрийг боловсруулан гаргаад байна.
