Ерөнхий сайд Ч.Сайханбилэгийн санаачлагаар цахим санал асуулга явуулсан нь нэлээд хэл ам дагууллаа. Санал асуулга гэгчийнх нь дүн ч гарлаа. Энэ дүнгээр үндсэндээ асуулгад тусгасан эхний асуулт буюу “Оюу толгой болон том төслүүдийг шийдэх замаар ханшаа тогтоох” гэснийг олонх нь “зөв” гэж үзсэн байна. Гэвч УИХ-ын гишүүн Ч.Улаан “Энэ бол хөгжлийн замаа сонгож байгаа асуудал огт биш. Ямар ч үнээр хамаагүй гадаадын хөрөнгө оруулалтыг татаж, төсөл хөтөлбөр хэрэгжүүлэх нь зөв гэж туйлширч болохгүй” гэв. Мөн УИХ-ын бие даагч гишүүдийн зүгээс “Оюу толгойн төслөөс эзэмшиж буй Монголын хувийг үнэгүйдүүлэх, гадаадынханд хямд үнээр худалдах далд санаа агуулсан санал асуулга боллоо” гэсэн байна. УИХ-ын З.Баянсэлэнгэ харин “Манайхан гар утас руу гадаадаас ч мессеж явуулж чаддаг. Тиймээс санал асуулгын дүнг худлаа гаргаж чадна. Ийм зохиомол санал асуулгын дүнд хэн итгэх юм” гэлээ. Ийнхүү Ч.Сайханбилэгийн цахим санал асуулгын дүнг зохиомол зүйл хэмээх гишүүд цөөнгүй ажээ.
Б.Баяр
Эх сурвалж: Tumen.mn
