Нийслэлийн ИТХ-ын ээлжит VII хуралдаан 11:00 цаг эхлээд байна.
Тус хуралдаанаар,
- Монгол Улсын Засгийн газрын “Нийслэл Улаанбаатар хотын талаар авах зарим арга хэмжээний тухай” 2021 оны 146 дугаар тогтоолын тухай танилцуулгыг сонсож,
- Дүүргийн хамгаалалтад байх түүх, соёлын үл хөдлөх дурсгалын жагсаалт батлах тухай,
- Нийслэлийн ИТХ, Улаанбаатар хотын Худалдааны танхим хамтран “Төр, хувийн хэвшлийн зөвлөлдөх хороо” байгуулах санал дэмжих тухай
- Тогтоолд өөрчлөлт оруулах тухай гэсэн дөрвөн асуудлыг хэлэлцэж байна.
КОВИД-19 цар тахлаас сэргийлэх онцгой дэглэмийг баримтлан Нийслэлийн ИТХ-аас хуралдаанаа цахимаар явуулж буй юм.
ШУУД ҮЗЭХ:
НИТХ-ын төлөөлөгч Т.Батцогт "Хоёр сарын дараа НИТХ хуралдаж байна. Гэтэл хэлэлцэж байгаа асуудлууд нь шаардлагагүй дөрвөн асуудал орж ирж байна. хамгийн гол асуудал бол коронавирусийн халдварын тухай асуудал гэж бодож байна. Өнөөдөр Улаанбаатар хот маш хүнд байдалд байна. Монгол Улсын нийслэл Улаанбаатар хотын ковидын нөхцөл байдлын талаар танилцуулж мэдээлэхгүй хэрэг үү. ААН эхнээсээ хэцүүдэж, иргэдийн нас баралт, өвчний хүндрэлүүд нь хэтэрлээ. Бид юу хийх ёстой юм. Огт КОВИД-19 байхгүй юм шиг дөрвөн асуудал хэлэлцээд өнгөрөх хэрэг үү. Иймд төлөөлөгч миний зүгээс тав дахь асуудал болгож, ковидтэй холбоотой асуудлаар мэдээлэл сонсох, санал санаачилга гаргах, хийх ажлаа ярих саналыг оруулж байна. Цар тахал Монгол Улсад байхгүй болтол хурал дээр хэлэлцэх ёстой. Сүүлийн үед иргэдийн хурал үндсэн чадамжаа алдаж байна. Төлөөллийн төв байгууллага байж чадахгүй байгаа. Ж.Батбаясгалан дарга таныг дарга байх хугацаанд иргэдийн хурал үндсэн чадамжаа алдаж байна" гэв.
НИТХ-ын төлөөлөгч П.Наранбаяр "Т.Батцогт төлөөлөгчийн саналыг 100 хувь дэмжиж байна. Ковидын үел цар тахалгүй юм шиг асуудлууд оруулж ирснийг бид сонгогчдодоо юу гэж тайлбарлах вэ. Хоёрдугаарт, Дүүргийн хамгаалалтад байх түүх, соёлын үл хөдлөх дурсгалын жагсаалт батлах тухай асуудлыг хойшлуулах саналтай байна" гэв.
Энэ удаа хэлэлцэх асуудлууд дээр КОВИД-19 цар тахлын үйл ажиллагааг сонсохыг асуудлыг нэмж хэлэлцэх талаар хуралд орсон төлөөлөгчдийн дунд санал хураалт явуулахад 52% дэмжихгүй гэв.
