УИХ-ын 18, 28 дугаар тойрогт явагдах УИХ-ын гишүүний нөхөн сонгуулийн санал авах өдөр аравдугаар сарын 10-нд болно.

Сонгинохайрхан дүүргийн 28 дугаар тойрогт "Зөв хүн электорат эвсэл"-ээс Б.Найдалааг нэр дэвшүүлэх болсныг мэдээллээ. Мөн Иргэний Зориг Ногоон Нам 28 дугаар тойрогт нэр дэвшигчээ тодруулсан бөгөөд энэ тухай маргааш /2021.08.31/ 12:00 цагт Хэвлэлийн хүрээлэнд мэдээлэл хийхээр болжээ. Бусад нам эвслээс нэр дэвшигчид тодорхойгүй байна.

Эргэн сануулахад УИХ-ын 28 дугаар тойрогт нэр дэвшиж, сонгогдсон Д.Сумьяабазар УИХ-ын бүрэн эрхээсээ өөрийн хүсэлтээр чөлөөлөгдөж, Хотын дарга болсон бол Хэнтий аймгийн 18 дугаар тойргоос сонгогдсон У.Хүрэлсүх Монгол Улсын Ерөнхийлөгчөөр сонгогдож УИХ дахь суудал эзэнгүй байгаа билээ.

Монгол Улсын Их Хурлын сонгуулийн тухай хуулийн 38 дугаар зүйлийн 38.8 дахь хэсэгт “Ээлжит бус, нөхөн сонгуулиар нам, эвсэл болон бие даан нэр дэвшигч нь Төрийн аудитын дээд байгууллагаас тогтоосон хугацаанд сонгуулийн мөрийн хөтөлбөр болон хандивын тайландаа дүгнэлт гаргуулахаар хүргүүлнэ” гэж заасан. Үүний дагуу Үндэсний аудитын газарт:

• Монгол Ардын нам
• Үнэн ба Зөв нам
• Шударга иргэдийн нэгдсэн эвсэл нам
• Дэлхийн монголчууд нам
• Гэр хороолол хөгжлийн нам
• Зөв хүн электорат эвсэл
• Ардчилсан нам
• Эрх Чөлөөг Хэрэгжүүлэгч нам
• Ард Түмний олонхийн засаглал нам
• Иргэний зориг ногоон нам тус тус мөрийн хөтөлбөр, хандивын тайлангаа ирүүлж Сонгуулийн Ерөнхий хорооноос батламжаа гарджээ.