Өнгөрсөн долоо хоногт манай орны хувьд гадаад түншүүдийн айлчлал ар араасаа шил дарсан өдрүүд тохиолоо. Болгарын Ерөнхийлөгчийн айлчиллын дараа Ерөнхий сайд Ч.Сайханбилэгийн урилгаар Бүгд Найрамдах Энэтхэг улсын Ерөнхий сайд Нарендра Моди манай оронд айлчлав . Түүний айчлал өнөөдөр өндөрлөж байна.
Манай хоёр орны хооронд дипломат харилцаа тогтоосны 60 жилийн ойн босгон дээр Нарендра Моди анх удаа айчилсан нь онцлогт үйл явдал боллоо. Тэрбээр УИХ-ын хүндэтгэлийн уралдаанд уригдаж үг хэлсэн юм.
Энэтхэг улс сүүлийн жил хүрэхгүй хугацаанд эдийн засгаа 7.5 увиар өсгөжээ. Тус улс хүн амын тоогоор дэлхийд хоёрт ордог бөгөөд хүчирхэг эдийн засагтай орны тоонд багтаж буй. Ялангуяа хөдөө аж ахуй, мэдээллийн технологиор дэлхийд тэргүүлж байна. Хөдөө аж ахуй нь тус улсын дотоодын нийт бүтээгдэүүний 20 хувийг бүрдүүлдэг. Хүн амын 40 хувь нь энэ салбартаа ажилладаг. Газар тариалангийн талбай нь нийт газар нутгийнх нь 46 хувийг эзэлдэг ажээ.
Нарендра Моди 1950 онд газрын тосны магнатын гэр бүлд төрсөн, улс төрд 40 жил бэлтгэгдэж Ерөнхий сайдын суудалд хүрчээ. Түүний хөгжилтэй, элэгсэг дотно харилцаа, эршүүд, зоримог чанарыг энэ өдрүүдэд парламентийн танхимд хэлсэн үгнээс нь болон хүндэтгэлийн арга хэмжээнд зориулсан бэсрэг наадмын үеэр монголчууд хангалттай анзаарсан болов уу. Тэр нум сум харвах зэргээр нүүдэлчдийн соёл, уламжлалтай биечлэн танилцлаа. Хамгийн түрүүнд зочилсон газар нь буддын шашны төв Гандантэгчэнлин байсан юм. Мөн тэр ёочин хөгжим тоглож, Ерөнхийлөгч Ц.Элбэгдоржтой хамт цахим ертөнцөд “сэлфи” хийж, зургаа тавин, айлчиллынхаа талаар “жиргэж” байлаа. Нарендра Модигийн твиттер хуудас 8 сая дагагчтай юм байна.
Нарендра Моди УИХ-ын хүндэтгэлийн чуулган дээр хэлсэн үгэндээ “ Оюун санааны хөрш байхаас илүү харилцааны эрхэм дээд хэлбэр гэж үгүй” гээд стратегийн түншиллийн харилцааг хөгжүүлэхийн чухлыг онцоллоо. Энэ нь хоёр орны харилцааны хэм хэмжээг нэг шат ахиулж буй хэрэг юм. Сайн санааны үзүүрт тос гэгчээр Энэтхэг улсаас манай улсад нэг тэрбум долларын хөнгөлөлттэй зээлийн шугам нээсэн нь эдийн засгийн хүнд нөхцөлд байгаа манайхны хувьд тун олзуурхууштай зүйл болж байна. Энэхүү зээлийг Монголын дэд бүтцийг хөгжүүлэхэд зориулах ажээ.
Хоёр улсын Засгийн газар хоорондын хэлэлцээрт мөн малын эрүүл мэнд, сүү сүүн бүтэгдэхүүний чиглэлээр хамтран ажиллахаар боллоо. Түүнчлэн, кибер аюулгүй байдлын сургалтын төв, Энэтхэг-Монголын найрамдалт дунд сургууль байгуулах, Уламжлалт анагаах ухаан, гомеопати буюу эмийн бус эмчилгээний салбарт хамтран ажиллах, Соёлын салбарт 2015-2018 онд хамтран ажиллах зэрэг олон талын хамтын ажиллагааны баримт бичгүүдэд гарын үсэг зурцгаалаа.
Б.Отгонбаяр
Эх сурвалж: Tumen.mn
