Жүжигчин Б.Амарсайханыг шалгах үеэр Шадар сайд асан, УИХ-ын гишүүн Ц.Оюунбаатар "Улстөрчийн захиалгаар хэн нэгэн хүнийг хэлмэгдүүлж баривчилбал дараа нь тухайн хүнд эрүүгийн хариуцлага яригдана. Монгол Улсын Үндсэн хуулинд заасан үг хэлэх, хэвлэн нийтлэх эрхийнхээ дагуу үзэл бодлоо илэрхийлсэн нь Монгол Улсын ямар нэгэн хууль зөрчөөгүй, хэн нэгэн хүний нэр төр, алдар хүндэд халдаагүй болно. Иймээс жүжигчин Б.Амарсайханд хариуцлага тооцох үндэслэл байхгүй " хэмээн илтэд эрүү, прокурорын ажилтнуудад заналхийсэн мессежийг твиттер хуудаснаа нийтэлсэн.

Гэвч 19 хоногийн дотор мөрдөн шалгах ажиллагаа явуулах ёстой Цагдаагийн ерөнхий газрынхан 2-хон хоногийн дотор эл хэрэг дээр ажиллаж, хоёр талын байр суурийг сонссон болоод яаран сандран өчигдөр Хэвлэлийн бага хурал зохион байгуулсан. Энэ үеэр ЦЕГ-ын Хэвлэл мэдээллийн төвийн дарга Ц.Баатархүү "Жүжигчин Б.Амарсайханыг "Би юу хийчихэв ээ" гэх бичлэгтэй холбогдуулан иргэн Г.Батбаярын өргөдлийн дагуу шалгасан. Ингээд Монгол Улсын Эрүүгийн байцаан шийтгэх хуулийн 172 дугаар зүйлийг удирдлага болгон мөн хуулийн 24-ийн 24.1-т зааснаар тухайн гаргасан өргөдлийг гэмт хэргийн бүрэлдэхүүнгүй байна гэж үзэн, эрүүгийн хэрэг үүсгэхээс татгалзах саналтай прокурорт шилжүүлсэн" гэсэн юм.

Ц.Оюунбаатар гишүүний энэ үйлдлээс харахад Төрийн өндөр дээд албан тушаалтнууд хэрэг бүртгэх, мөрдөн байцаах ажиллагаанд нөлөөлдөг байж болзошгүй гэх хардлага эрхгүй төрж байгаа юм.

Дашрамд дурдахад, хуульч, өмгөөлөгч Г.Батбаяр жүжигчин Б.Амарсайханыг "Олон нийтийн амар тайван байдлыг алдагдуулж, оюун санааны хүчирхийлэлд өртүүлэх замаар нийгмийн тогтворгүй байдлыг бий болгоход чиглэгдсэн хууль зөрчсөн сурталчилгаа явуулсан.." буюу Эрүүгийн хуулийн 821, 110, 111, 236 дугаар зүйл ангиудаар тус, тус гэм буруутай байна гэж үзээд СБД-ийн Цагдаагийн Нэгдүгээр хэлтэст өнгөрсөн даваа гарагт өгсөн юм.

Х.Маргад