Баянхонгор аймгийн Богд сумын нэгдүгээр багийн Ам гол гэдэг газар хаваржиж байсан айлын тэмээ галзуурчээ. Галзуурсан тэмээ хөтөлж явсан хүүхдийн толгойноос хазаж, шүлсэдсэн байна. Сумын мал эмнэлгийнхэн уг тэмээг алж устган, халдваргүйтгэл хийсэн байна. Шинжилгээгээр, тэмээ галзуу өвчин туссан нь батлагдсан бөгөөд тухайн айлын бусад малыг вакцинжуулж, хазуулж шүлсдүүлсэн хүүхдэд галзуугийн вакцины эхний тунг хийсэн байна. Түүнчлэн Баянхонгор аймгийн Гурванбулаг сумын хоёрдугаар багийн нутаг Худагт гэдэг газар хаваржиж буй айл руу чоно дайрч, малчны зүүн гарын шууг хазаж, улмаар гэр дээр нь гарчээ. Сумынхан уг чоныг устгахаар хайж байгаа гэнэ. Тухайн айлын бүх малд галзуугийн эсрэг вакцин тарьсан байна. Чононд хазуулсан хүний шархыг цэвэрлэж, галзуугийн ийлдэс болон вакцины эхний тунг тарьж, эд зүйлсийг ариутгаж, халдваргүйжүүлжээ.
Эх сурвалжwww.wikimon.mn
