Ерөнхий сайд Ч.Сайханбилэг засгийн газрын шинэ сайд нарын нэрсийг өнөөдөр өргөн барина гэх мэдээлэл явж буй. Үүнтэй зэрэгцээд улс төрийн нам эвслүүд дэд сайд нарынхаа нэрсийг дотооддоо тохирч, нэгдсэн шийдэлд хүрээд байгаа юм.
Тухайлбал, ИЗНН-аас Төрийн байгуулалт, хууль зүйн асуудал хариуцсан Нарийн бичгийн дарга Р.Булгамааг БСШУЯ- нд дэд сайдаар томилуулах шийдэлд хүрсэн талаар эх сурвалж мэдээллээ. Р.Булгамаа нь 2000 оноос “Улаанбаатар-Эрдэм” дээд сургуульд багш, 2001 оноос ИЗИС-ийн Иргэний эрх зүйн тэнхимд эрх зүйн багш, факультетийн декан, Сургалтын менежментийн албаны дэд даргаар ажиллаж байсан. Улмаар 2006 оноос Сургалтын бодлого зохицуулалтын газрын дарга, Сургалт эрхэлсэн захирлаар ажиллаж байгаа боловсролын салбараа сайн мэдэх нэгэн аж.
Түүнээс гадна Р.Булгамаа нь Үндэсний арбитрч, магадлан итгэмжлэх Үндэсний зөвлөлийн шинжээч, өмгөөлөгчийн албан ёсны мэргэшилтэй учраас намаас нь итгэл үзүүлж, дотооддоо өндөр албан тушаал хашуулдаг гэх мэдээлэл бий.
“Иргэний зориг” намын дарга С.Оюун 2012 онд УИХ-ын сонгуульд хүч үзэж байсан Р.Булгамааг боловсролын салбарт олон жил үр дүнтэй ажилласан туршлагыг нь үндэслэн дэд сайдад нэр дэвшүүлэх саналыг өгсөн байна.
ИЗНН-ын хувьд “Шийдлийн засгийн газар”-ын өмнөх бүрэлдэхүүнээс дэд сайдын суудал аваагүй ганц улстөрийн нам бөгөөд тодорхой туршлага бүхий хүнд сайдын суудал амладаг С.Оюун даргын оноолт энэ удаа ч мөн зөв байгаа олов бололтой.
Г.Итгэл
