Хууль зүйн дэд сайд асан Э.Эрдэнэжамьянг 2013 онд Интерполын Ерөнхий нарийн бичгийн даргын газарт “Монгол Улсын Интерполын үндэсний товчооноос илгээсэн мэдээллийн дагуу олон улсын хэмжээнд эрэн сурвалжлагдаж буй гэх Н.Энхбаярын дүү Н.Энхтуяа болон Б.Хуяг нарыг олон улсын хэмжээнд эрэн сурвалжлах ажиллагааг зогсоож өгөөч” гэсэн утгатай имэйл буюу цахим шуудан захидал илгээснийг хууль хяналтынхан эрүүгийн гэмт хэргийн бүрэлдэхүүнтэй гэж үзсэн юм. Тиймээс шүүхээс Э.Эрдэнэжамьянд албан тушаалаа ашиглан мөрдөн шалгах үйл ажиллагаанд санаатайгаар саад учруулсан гэж үзээд улс төрийн албан тушаалд ажиллах эрхийг хоёр хилээр хасч, хөдөлмөрийн хөлсний доод хэмжээг 60 дахин нэмэгдүүлсэнтэй тэнцэх хэмжээний мөнгөн торгууль оногдуулсан байдаг. Тэгвэл улсад 11.520.000 мянган төгрөгийн өрөнд орсон Э.Эрдэнэжамьянг шүүхээс мөнгөө барагдуулахыг шаардсан байна. Энэ тухай тэрбээр “Хяналтын прокурортойгоо уулзав. Торгуулийн ялаа цаг хугацаандаа төлөхгүй бол хорих ялаар дүйцүүлж солино гэдгийг анхаарууллаа. Уг нь би шийдвэр гүйцэтгэгчдээ бөөнөөр нь төлахөд арай л амжихааргүй байна. Сар бүр хэсэгчлээд төлье гэж хүсэлт тавьсан. 2 сая төгрөг тушаачихсан. Цагаан сар гэх мэтээр бас ар гэр, ахуй амьдралын шаардлагаар мөнгөний бололцоо байх байхгүй үе таарч байдаг. Гэтэл болдоггүй номтой юм байна.
Огт төлөхгүй гэж ч гүрийхгүй л дээ. Төрийн нэрийн өмнөөс түсхийтэл өгсөн шүүхийн шийдвэр хойно. Тэгэхдээ хаа сайгүй хямрал болоод мань мэтийн ядуу буурай иргэн байтугай том компаниуд нь өр төлбөрөө өгөхгүй гүрийцгээгээд л байгаа учрыг бас бодмоор юм гэх мэтчилэн өөрийгөө өмгөөлж суулаа. Гэтэл маний хэдхэн төгрөгний торгууль битгий хэл 35 тэрбум төгрөгийг улсад төлөх ёстой улсууд нь уучлагдаж өршөөгдөөд л, баяр хөөр болоод байхлаар бас тиймэрхүү л санагдах юм.
Одоо бас хилээр орох гарах эрх хаана л гэж байна лээ. Журам нь тийм байдаг гэнэ. Тэгэхээр 35 тэрбум зувчуулсан гадаад нь гэртээ харьчихдаг мань мэт нь Эрээн, Улаан-Үдээр гарч ганц нэг хэрэгцээтэй эд хогшлоо цуглуулж болохгүй болчихдог бас муухай байна шүү тээ.
Ажил төрөл хийеээ гээд ганц нэг зарласан ажилд нь анкет бөглөх гэхлээр "ялгүй байх" гэдэг шаардлагыг хаа сайгүй тавьчихсан байх юм.
Улсад ажиллаж болохгүй, хувьд ажиллаж болохгүй, хуульчаа хийж болохгүй би, улс төрийн албан тушаал хашиж болохгүй, гадагшаа гарч болохгүй Монгол улсын иргэн би хаачнам, хаанаас мөнгө олж торгуулиа төлнөм?” хэмээн өөрийн цахим хуудсанд бичжээ.
Б.Анир
