Дэд сайдын охины хэргийг шүүхэд шилжүүлж, Э.Энхбат нарын ялыг хэвээр үлдээлээ

Монгол, Хятадын иргэд нийлж мансууруулах бодис хууль бусаар олж авч борлуулахыг завдсан хэргийг НПГ-аас яллах дүгнэлт үйлдэж, Баянгол дүүргийн Эрүүгийн хэргийн анхан шатны шүүхэд шилжүүлээд байна. Тодруулбал, Эрүүл мэндийн дэд сайдаар ажиллаж байсан Т.Болдбаатарын охин Б.Буянжаргал болон түүний найз У.Анхбаяр, БНХАУ-ын иргэн Нарангаова, Лай Фужун нарт прокурор Эрүүгийн хуулийн 20.7-2 дахь хэсэгт заасан “Мансууруулах эм, сэтгэцэд нөлөөт бодис, тэдгээрийн түүхий эдийг худалдах зорилгоор хууль бусаар олж авсан, бэлтгэсэн, боловсруулсан, хадгалсан, тээвэрлэсэн, илгээсэн, худалдсан”, 24.3-1-ийн “Химийн хорт, аюултай бодисыг хууль бусаар улсын хилээр нэвтрүүлсэн, үйлдвэрлэсэн, хадгалсан, худалдсан, авсан, тээвэрлэсэн, бусдад дамжуулсан, зориулалт бусаар ашигласан” гэх үндэслэлээр яллах дүгнэлт үйлдсэн аж. Эл дөрвөн хүнийг өнгөрсөн нэгдүгээр сард саатуулсны дараа нэр, зориулалт нь үл мэдэгдэх их хэмжээний химийн бодис гэрээс нь хураасан учраас дээрх байдлаар буруутгаж буй гэнэ. Тэдэнд холбогдох хэргийг тус шүүх өнгөрсөн арванхоёрдугаар сард хэлэлцэхээр товлосон байсан ч нэг шүүгдэгч нь цар тахлын улмаас хөл хорионд орсон тул хойшлуулах захирамж шүүгч гаргажээ.

Үүнээс гадна хилээр мансууруулах бодис оруулж ирсэн, хүлээн авсан, хууль сахиулах байгууллагын ажилтнуудыг эсэргүүцэн биед нь халдсан гэх хэрэгт ял шийтгүүлсэн, “Шар Энхээ” гэж хүмүүст танигдсан Э.Энхбат болон Э.Насанжаргал, Б.Цолмон, Б.Чинзориг нарт холбогдох хэргийг тэдний өмгөөлөгч нарын гаргасан гомдлын дагуу нийслэлийн Эрүүгийн хэргийн давж заалдах шатны шүүхэд хэлэлцсэн байна. Хан-Уул дүүргийн Эрүүгийн хэргийн анхан шатны шүүх Э.Энхбатад найм, хилээр мансууруулах бодис оруулж ирсэн, цагдаагийн ажилтныг эсэргүүцсэн Э.Насанжаргал, Б.Цолмон нарт долоо, шүүгдэгч Б.Чинзоригт дөрвөн жил хорих ял шийтгэсэн бөгөөд анхан шатны шүүхийн шийтгэх тогтоол үндэслэлтэй гэж дүгнэн гомдлыг нь хэрэгсэхгүй болголоо.