“Мунзуй” хочит Г.Нямдоржийг сүүлийн үед танихгүй хүн бараг үгүй болсон болов уу. Өнгөрсөн онд тэрбээр УИХ-ын гишүүн Н.Номтойбаяртай зоогийн газарт муудалцаж, Н.Номтойбаяр нь түүний найзыг хутгалсан гэх дуулианы эзэн болж байв.  Тэдний аль аль нь эрүүгийн хэрэгт шалгагдаж, эцэст нь Н.Номтойбаяр хүн хутгалаагүй гэгдэж прокуророос  хэргийг хэрэгсэхгүй болгосон байлаа. Харин прокурорын энэ шийдвэрийг өнөөх хутгалуулсан гэх “Мунзуй” Г.Нямдоржийн найз н.Баттулга нь “Н.Номтойбаярын хэргийг хэрэгсэхгүй болгосон нь ямар ч үндэслэлгүй” хэмээн хэвлэлүүдэд ярилцлага өгч, мэдэгдэж байсан юм. Гэвч уг хэрэг тэгсхийгээд чимээгүй болжээ. Тэгвэл “Мунзуй Г.Нямдорж саяхан покер тоглоомоор мөрийтэй тоглосон хэрэгт холбогдож, шүүхээс нэг жил хорих ялаар шийтгүүлсэн байна. Түүнтэй хамт УИХ-ын гишүүн асан Х.Бадамсүрэнгийн хүү Б.Бүрэнжаргал, “Люмино” хамтлагийн Б.Батхишиг нарын зэрэг дөрвөн хүн мөрийтэй тоглосон боловч тэд ямар нэг ял сонсоогүй аж. Иймд “Мунзуй” Г.Нямдорж  “Шүүгч, прокурорууд шударга бус байна” хэмээн гомдол тавьж байгаа юм байна. “Мунзуй” Г.Нямдорж нь УИХ-ын гишүүн Н.Номтойбаярын багын найз гэдэг бөгөөд урьд нь зодооны хэргээр ял эдэлж байсан нэгэн. Түүний хувьд “Ноёдтой өштэй бол толгойгүй”  гэгч болж буй нь энэ юм болов уу. 

Б.Баяр 

Эх сурвалж: Tumen.mn