Сонгууль ойртож, намрын улс төр албан ёсоор эхэлж байгаа хэнгэрэгийг Женко албан ёсоор цохиж мэдэгдлээ. Сүүлийн 16 жилийн турш Монголын улс төрийн хамгийн том, нөлөө бүхий хүмүүсийн нэг нь яалт ч үгүй тэр байв. Тэр ирж явна. Гэхдээ АН-тайгаа.

Зураач, оёдолчин, бөх, 17 чингэлэг спиртийн хэрэгтэн, ЗТХ-ийн сайд, 280 сая долларыг газарт булагч, танк төмөр замаар орж ирэхээс айгчаас авахуулаад Төрийн тэргүүнд хүртэл заларч явсан баялаг намтар, арвин хавтаст хэрэгтэй хүн бол тэр.

АН-ыг хагалан бутаргасан хүн нь Х.Баттулга. Гэтэл тэр одоо Хөх туг барин хөх дээл өмсөн хөдөөгүүр улс төрийн ажлаа эхлүүлээд байна. Түүнийг дагаж Баянхонгорын гаралтай УИХ-ын гишүүд болох А.Адъяасүрэн, С.Ганбаатар нар явж байна. Олонд мэдэгдээд байгаа АН-ынхан нь тэд.

Гэхдээ тэдний цаана АН-ын дарга Л.Гантөмөр чимээгүйхэн хамт яваа гэнэ. Тэд Өвөрхангай, Баянхонгороор яваа бөгөөд удахгүй Хөвсгөлд очно гэдгийг Баабар хэллээ.

Тэр мэдээж намынхаа гишүүн, дэмжигчийн хувиар ирэхгүй нь мэдээж. Жагсаалтын квот чамгүй олныг нэхэх нь дамжиггүй. АН-д дайсагналцдаг С.Эрдэнэ Х.Баттулга нар хэрхэн эвлэлдэх нь сонин. С.Эрдэнэ Л.Гантөмөрт тамгаа хүлээлгэж өгөхдөө “АН-ын дотоодод үүсээд байсан зарим нэг үйл ойлголцлын асуудлуудыг эцэслэж, цэг тавьж өнөөдөр АН нэгдмэл нэг удирдлагатай боллоо. Бид цаашид нэгдмэл санаа зорилготойгоор улс эх орныхоо төлөө тэмцэх болно” гээд хэлчихсэн. Гэтэл Л.Гантөмөр нь түүний дургүй Женкотой хөтлөлцөх болсон нь эргээд АН дотор хагарал үүсгэж мэднэ. Магадгүй С.Эрдэнэ намынхаа жолоог Л.Гантөмөрт атгуулахдаа хэлсэн үгэндээ эзэн байгаад түүний шийдвэрийг хүлээн зөвшөөрч буй бол АН-д С.Эрдэнийн, Женкогийн, Л.Гантөмөрийн гэсэн гурван фракц хэрхэн зохилдохыг бид удахгүй харна.

Нөгөөтэйгүүр Женко нэгдсэнээр магадгүй АН цэвэршиж байна, улс төрийн тогоонд арай өөр ардчилал буцлах нь гэсэн олон нийтийн хүлээлт унана.