Румын улсын нийслэл Бухарест хотын захирагч Сорин Опреску гэх хижээл насны “цагаан толгойтой” эрхэм бий. Румын улсын АН-аас /Соцдек/ угшилтай энэ эрхэм нийслэл хотоо удирдаад багагүй хугацааг өнгөрөөж буй. Хотын мэрээр анх сонгогдохдоо сайн, сайхан зүйл амлан гарч ирсэн нэгэн, сонгуульд өрсөлддөг бусдын л адил хулхин дээр нь цэцэг ургуулдаг улстөрч. 2008 оноос хойш нийслэлээ түгжрэлгүй болгох гэж өчнөөн зүйл сэдсэн. Дугаарын хязгаарлалтаас бусдыг хийсэн гэдэг. Бас болоогүй дэд бүтэц, зам харгуйгаа шинэчилж байв. Түүний сонгуулийн гол уриа нь Дунай мөрний суваг. 10 орчим орныг дамнан урсдаг энэ мөрнийг Бухарест хоттой цаашлаад боомт болгон хойд Европтой холбох энэ төслийг анх 1986 онд соц нийгэм задрахын өмнө эхлүүлсэн ч хөрөнгийн гачааллаас одоог хүртэл ашиглалтад бүрэн оруулаагүй байгаа юм. 2008 онд Сорин Опреску энэ төслийг Европын холбооны санхүүжилтээр дуусгана хэмээн амлаж сонгуульд ялж байв. Дөрвөн усан цахилгаан станц, далайн тээврийн боомтыг энэ сувагт барьж хэдэн мянган ажлын байр бий болох байжээ. Төслийн дагуу л даа. Гэвч тэрээр мэр болоод ихэнхи улстөрчдийн адилаар загасны ой санамжтай болж, аар саархан зүйл хийж зөвхөн түрийвчээ түнтийлгэх, тойрон хүрээлэгчдээ баяжуулах алхам хийж эхэлсэн хэмээн төвийн хэвлэлүүд нь бичиж байна. Яг л манай хотын мэр, “Цагаан толгойт Баатар”-ын “Нийслэлд метро барина, үүнийг дагаад 150 мянган ажлын байр бий болно. Метрондоо далайн аквариум хийж хүүхэд багачууддаа үзүүлнэ. Далайн гахайг би амьдаар нь харж байгаагүй, тэгэхээр манай багачуудын олонхи нь хараагүй байж таараа. Мөн ч их баярлана даа” хэмээгээд таг болсон шиг (худал хэмээвэс дурын сайтаас Үүл баатрын амлалтуудаас үзэж болно). Ялгаа нь гэвэл Улаанбаатарт метро барихаар нэг метр газар ч ухаагүй бол Бухарестад ядаж л нэг усан цахилгаан станц барьчихаад байгаа юм.
Өнгөрсөн долоо хоногийн сүүлчээр Румыны нийслэл Бухарест хотын захирагч Сорин Опрескуг гэрээс нь баривчилжээ. Түүнийг авлигын хэрэгт сэжигтнээр татаж, 30 хоног хүртэл саатуулах хүсэлтэй байгаагаа прокурорын байгууллагаас мэдэгдээд байгаа юм. Прокурорын байгууллагаас Сорин Опрескуг хотоос ажил авсан компаниудаас үнийн дүнгийн 10 хувийг авлигад авдаг байсан гэдэг үндэслэлээр цагдан хорьсон. Ажил авсан компаниудын мэдүүлснээр бол ашгийнхаа 70 орчим хувийг хотын удирдлагуудад өгч үлдсэн 30 хувиар амиа зогоодог байжээ. Хамгийн сүүлийн мэдээллээр түүний орлогчид, дагуул 13 хот, хэд хэдэн мужийн албан тушаалтны байранд нэгжлэг явуулсан бөгөөд тэдгээр нь аавын хаалга, авлигын хэрэгт Захирагчтайгаа хамт татагдахад ойрхон байгаа аж. Түүнийг хуулийн байгууллагын мэдээлэгчээс авлига авах үйлдэл дээр нь саатуулсан юм.
Сорин Опрескуг өдгөө Румынд Засгийн эрх барьж буй соцдекүүд дэмждэг байна. 64 настай тэрбээр өмнө нь Социал демократ намаас тус улсын Сенатын буюу манайхаар бол УИХ-даа хоёр ч удаа сонгогдож байсан. Румын улсад ардчилал гарч байхад манлайлан удирдаж явсан, ард түмэндээ ардын “Баатар” хүртлээ өргөмжлөгдөж байсан нэгэн гэдэг. Болоогүй Ерөнхийлөгчийн сонгуульд нэгэнтээ өрсөлдөж байсан. Ойр дотныхон нь хоёр жилийн дараа болох Ерөнхийлөгчийн сонгуульд маргаангүй ялах лидер хэмээн өргөмжилдөг байж. Хаа явсан газарт нь хэвлэлийнхэн багширч. Хийсэн зүйл бүр нь оройн мэдээгээр гарч, сонины шар хуудаснаа түүний зураг гардаг байж.
Бухарест хотын захирагчийн эхнэр болон хүүхдүүд сүүлийн хэдэн жил багагүй тансаглажээ. Түүний эхнэр 600 сая евро танилдаа зээлдүүлж, хүүхдүүд нь хауст амьдарч, хар машинаар гангарах болсон байна. Ууган хүү нь чаддаг, чаддаггүй ч барилгын бизнест хүч үзэх болсноор хууль хүчнийхний харааг түүний болон гэр бүлийнхэн рүү чиглүүлсэн гэдэг. Румын улс авлигатай тэмцэх чиглэлээрээ дээгүүрт явдаг. “Транспэренси интернэйшнл” байгууллагаас гаргасан рейтингээр 175 орноос 69-д эрэмбэлэгдсэн гэхээр авлигатай хэрхэн тэмцдэг нь харагдаж байгаа хэрэг. Харин манай улсын Авлигатай тэмцдэг рейтинг дээрх байгууллагын судалгаагаар Румынаас 11 байр хойно явна. Сорин Опрескугийн дараагаар хуулийнхан нь Ерөнхий сайдаа хуурамч бичиг баримт бүрдүүлсэн, татвараас санаатайгаар зайлсхийсэн, мөнгө угаасан гэх хэрэгт буруутган сэжигтнээр татаад байгаа юм.
Нэгэн үе Румыны баатар болтлоо өргөмжлөгдөн явсан ардчилагч, нөхөрсөг, цагаан толгойт хотын даргыг авлигын хэргээр сэжигтнээр баривчлаад байна. Түүнийг балласан нь хүү нь гэнэ билээ, хэн мэдэх вэ. Түүх давтагддаг гэх яриа бий.
О.Сүрэн
