“Олон улсын сувилагчдын өдөр” тохиож байна. Үндэсний статистикийн хорооноос гаргасан мэдээллээр манай улсад өнөөдрийн байдлаар 13,473 сувилагч эрүүл мэндийн байгууллагад ажиллаж байна. Үүнээс 13,009 нь буюу 96.5 хувь нь эмэгтэй, 464 буюу 3.5 хувь нь эрэгтэй байна. Уг өдрийг тохиолдуулан Төрийн ордонд “Сувилагчид ээлтэй монгол” сувилахуйн үндэсний чуулган болж байна.

Энэ үеэр УИХ-ын гишүүн Ж.Чинбүрэн “Сувилахуйн салбарт 30 гаруй жил ажилласан ахмад байранд орж чадаагүй, 20 орчим жил ажилласан нь цалингийн зээлтэй, харин 20 гаруй насны залуус нь ирээдүйдээ итгэл муутай байна. Энэ бол монголын 13 мянга гаруй сувилагчийн хамгийн том тулгараад буй нийгмийн асуудал. Үүнийг шийдэх шаардлагатай.

Сувилагчдад нийгмийн даатгалын шимтгэлээр бүрдэх хувийн тэтгэврийн дансыг барьцаалах замаар урьдчилгаагүйгээр Ипотекийн зээлд хамруулах гаргалгааг өнөөдөр дэвшүүлж байна.

Та бүхэнд энэ дэмжлэг ус, агаар мэт хэрэгтэй. Мөн ийм хэмжээний дэмжлэг хүртэх эрхтэй гэж УИХ-ын гишүүн, эмчийн хувьд үзэж байна. Сувилагч нараа сонсох цаг үнэхээр тулгамдаж байна. Зарим үйлчлүүлэгч нар андуурах нь бий. Сувилагч гэхээр зөвхөн тариа тарьдаг, шинжилгээ авдаг хүн мэт хандаж, ёс зүйгүй харьцдаг. Харин таны гар хөл, нүд хараа бүгдийг мэдэрч эмчийн хань болдог, эрүүл мэндийн салбарын эрдэнэ юм шүү гэдгийг хэлэхийг хүсэж байна” гэлээ.